Një alarm i kuq për klimën globale është lëshuar nga Gjeneva, ku Organizata Botërore Meteorologjike ka paralajmëruar se fenomeni i fuqishëm El Nino pritet të rrisë ndjeshëm rreziqet e motit ekstrem gjatë vitit 2027, duke shënuar episodin më të fortë në më shumë se 70 vjet.
Situata paraqitet veçanërisht kritike për shkak të të dhënave që vijnë nga thellësitë oqeanike të Paqësorit, ku është identifikuar një rezervuar gjigant me ujëra me temperatura në 2-3 gradë celsius mbi normalen.
Duke konfirmuar këtë ecuri shqetësuese, Sekretarja e Përgjithshme e Organizatës Botërore të Meteorologjise, Celeste Saulo deklaroi për gazetarët se këto parashikime tregojnë një probabilitet të lartë që El Nino do të vazhdojë deri në shkurt të vitit 2027.
El Nino është vendosur fort në Paqësorin tropikal. Temperaturat e sipërfaqes së detit në rajon janë tashmë shumë mbi mesataren dhe po vazhdojnë të rriten. Kjo do të thotë se ekziston një pellg i madh me ujëra shumë të ngrohta oqeanike që do të nxisin intensitetin e El Niño-s.
Ndikimi i këtij fenomeni nuk do të kufizohet vetëm te termometri, por do të shtrihet thellë në strukturat sociale dhe ekonomike.
Ky El Niño do t’u shkaktojë një goditje të madhe komuniteteve, ekonomive dhe zinxhirëve të furnizimit në të gjithë globin.
Për tiu përgjigjur këtij kërcënimi, agjencia e OKB-së ka nisur një mobilizim masiv me shërbimet meteorologjike kombëtare për të forcuar sistemet e paralajmërimit të hershëm dhe për të marrë masa paraprake mbrojtëse, veçanërisht në rajonet më vulnerable.
/vizionplus.tv
