Sulmuesi i Argjentinës, Lautaro Martinez, ka ndarë një mesazh prekës për Lionel Messin, duke e falënderuar për gjithçka që ka bërë për kombëtaren argjentinase dhe për brezin e lojtarëve që kanë luajtur krah tij.
“Nga përqafimi i parë deri tek i fundit”, shkruan Martinez në Instagram, ndërsa e cilësoi Messin si një lider që ka lënë pas shumë më tepër se gola, asiste dhe trofe.
Lautaro theksoi se mësimet e Messit jashtë fushës — “të mos dorëzohesh, të vazhdosh të luftosh pas çdo pengese, të punosh në heshtje dhe mbi të gjitha të besosh gjithmonë te vetja” — do të mbeten me të dhe me shokët e skuadrës për gjithë jetën.
“Faleminderit për çdo këshillë, çdo bisedë, çdo stërvitje, çdo përqafim dhe çdo moment të ndarë. Faleminderit që bëre histori me ne dhe që na lejove të ishim pjesë e historisë tënde”, shkroi sulmuesi.
Në fund, Martinez i drejtohet Messit me fjalët: “Do të na mungosh shumë, kapiten.”
