Çdo të premte në orën 5 të pasdites, përfaqësuesit e pasqyrës besnike do të raportojnë për çdo problematikë të qytetarëve. Këtë gjë e bëri të ditur kryeministri Edi Rama, teksa shtoi se kjo procedurë do të vazhdojë për sa ko hë vetë ai do të qëndrojë në krye të PS.
Rama më tej, tregoi edhe vijën e panegociueshme, deputeti nuk do jetë më sekser dhe të telefonojë drejtorët e institucioneve, e as nuk do të ketë dallim partiake. Hallet e qytetarëve do të zgjidhen njësoj.
“Çdo të premte, në orën 5 sa të jem unë krye të PS do raportoni për Pasqyrën Besnike dhe do mbani shënim çdo gjë që flitet. Prania Besnike nuk pranon kamera. Prania Besnike pranon fotografi në fillim të takimit me miratimin e atyre që janë të pranishëm pa ekspozuar fytyrat e tyre. Nuk ka rëndësi me kë parti je, nëse ke qenë kundër PS, veshët tanë janë aty për këdo, të premte. Prania Besnike nuk pranon dhënien e numrit të telefonit dhe për të mos e hapur më pas telefonin. Prania Besnike është një sistem që duhet të disiplinojë sektorët dhe jo që deputetët të bëhen sekserë. Deputetët mos marrin më drejtorët në telefon, por përmes shkresës të dërgojë në institucion çdo gjë.
Në praninë besnike nuk shkohet sa është rritur ekonomia por se çfarë nuk na thotë shifra e te ardhurave. Në praninë besnike nuk shkohet për të gjetur vende pune dhe vota, as për patronazhistë. Por për të marrë hallin dhe për ta çuar tek institucionet. Këtu ka një vijë të panegociueshme, nëse duam që pasqyra të funksionojë jo si shfaqja e fundit e PS por që të gjitha këto të japin një fuqi të re forcës tonë. Partia nuk e bën shtetin. Deputeti nuk negocion favore. Militanti nuk është rruga e qytetarit për të marrë të drejtën që njeh ligji dhe të gjitha bashkë nuk janë kalaja dibrane”, tha Rama.
