Matthew Hayden-Johnson, sot 25 vjeç, ende mban shenjat fizike të ndërhyrjeve të panevojshme mjekësore që iu bënë gjatë fëmijërisë. Nëna e tij, Lisa Hayden-Johnson, e kishte paraqitur për vite me radhë si “fëmijën më të sëmurë në Britani”, duke pretenduar se vuante nga sëmundje të rënda.
Që në moshën katërvjeçare, Matthew u detyrua të përdorte karrocë invalidi dhe iu nënshtrua trajtimeve të shumta për sëmundje që më vonë rezultuan të ishin të sajuara. Nëna e tij pretendonte se ai kishte, ndër të tjera, fibrozë cistike, paralizë cerebrale, diabet dhe alergji ushqimore.
Në total, Matthew iu nënshtrua 325 vizitave dhe ekzaminimeve mjekësore, ndërsa kaloi nëntë herë nën anestezi të përgjithshme. Një prej ndërhyrjeve ishte vendosja e një tubi ushqimi, për të cilën ai thotë se i ka mbetur ende një shenjë në trup. “Duhej të operohesha për ta vendosur dhe ende kam shenja”, rrëfeu ai në emisionin “This Morning” të ITV.
Mashtrimi nisi të zbulohej kur mjekët dhe stafi i shkollës ngritën dyshime për gjendjen e tij. Një pajisje për matjen e nivelit të glukozës u bë një nga provat kryesore. Mjekët i dhanë nënës një pajisje të re, të pajisur fshehurazi me mekanizëm monitorimi, dhe zbuluan se ajo përsëriste matjet derisa të merrte rezultatin që përputhej me pretendimet e saj për diabetin.
Ndërkohë, nëna kishte përfituar famë, donacione, udhëtime dhe mijëra paund, ndërsa Matthew paraqitej publikisht me bombola oksigjeni dhe pajisje mjekësore. Ai kishte takuar edhe figura të njohura, ndërsa familja kishte kërkuar për të një çmim kombëtar për guximin. Por videot e pushimeve, ku Matthew shfaqej duke vrapuar, notuar dhe ngrënë normalisht, ndihmuan në rrëzimin e historisë së saj.
Në vitin 2010, Lisa Hayden-Johnson u dënua me tre vjet e tre muaj burg për abuzim ndaj fëmijës dhe pengim të drejtësisë. Gjyqtari e përshkroi atë me fjalë jashtëzakonisht të rënda, duke e cilësuar si një person mizor, manipulues dhe të çrregulluar.
Sot, Matthew ka ndërprerë marrëdhënien me nënën e tij. Ai thotë se ndien më shumë zhgënjim sesa zemërim për atë që ndodhi dhe veçanërisht për faktin se abuzimi vazhdoi për kaq shumë vite pa u zbuluar më herët. Historia e tij trajtohet në dokumentarin e ri të Channel 4, “Love You To Death”, ndërsa rasti konsiderohet një shembull i FDIA, ku një kujdestar sajon ose shkakton probleme shëndetësore te një fëmijë për të tërhequr vëmendje ose përfitime.
/vizionplus.tv
