Një vaksinë e personalizuar me ARNi , e hartuar bazuar në tumorin e secilit pacient, duket se po hap një rrugë të re për trajtimin e melanomës .
Në një provë të madhe klinike të Fazës 3, trajtimi, kur u dha së bashku me imunoterapinë , zgjati kohën që pacientët me rrezik të lartë mbetën pa sëmundje.
Të dhënat e hershme tregojnë gjithashtu se kombinimi uli rrezikun e përhapjes së kancerit në organe të tjera.
Megjithatë, ende nuk dihet se sa i madh është përfitimi ose sa zgjat, pasi rezultatet e plota nuk janë publikuar ose nuk i janë nënshtruar ende një shqyrtimi të pavarur shkencor.
Çfarë tregoi prova e madhe klinike?
Studimi përfshinte më shumë se 1,000 pacientë me melanomë të fazës 2, 3 ose 4 me rrezik të lartë, të cilët më parë i ishin nënshtruar një ndërhyrjeje kirurgjikale për heqjen e tumorit. Pacientët morën ose vaksinën e personalizuar së bashku me imunoterapinë pembrolizumab , ose vetëm imunoterapinë.
Sipas rezultateve të para, kombinimi rriti ndjeshëm kohën pa rikthim të sëmundjes dhe në të njëjtën kohë kufizoi rrezikun e metastazave të largëta, krahasuar me imunoterapinë vetëm.
Si i synon tumoret
Vaksina, e zhvilluar nga MSD (Merck) dhe Moderna , nuk është një vaksinë parandaluese, por një ndërhyrje terapeutike, e cila krijohet individualisht për secilin pacient. Për ta përgatitur atë, shkencëtarët marrin një mostër të tumorit të pacientit dhe analizojnë materialin e tij gjenetik për të identifikuar mutacionet që karakterizojnë qelizat kancerogjene.
Pastaj, duke përdorur teknologjinë mRNA, ata hartojnë një vaksinë të personalizuar që synon këto mutacione specifike. Qëllimi është të “stërvitet” sistemi imunitar për të njohur dhe sulmuar qelizat kancerogjene që mund të kenë mbetur në trup pas operacionit. Në këtë mënyrë, trajtimi përpiqet të funksionojë si një “hartë shënjestrimi” shumë personale e kancerit, e ndryshme për secilin person.
Të dy kompanitë po testojnë terapi të ngjashme të personalizuara në tumore të tjera të ngurta, siç është kanceri i mushkërive, fshikëzës dhe veshkave.
Optimizmi i kujdesshëm i ekspertëve
Dr. Talisia Quallo, Drejtoreshë e Parandalimit dhe Zbulimit të Hershëm në Cancer Research UK, e quajti hulumtimin “shumë premtues”, por theksoi se të dhënat e ndërmjetme ende duheshin vlerësuar plotësisht. “Është jetike që hulumtime të tilla të vazhdojnë të financohen në mënyrë që më shumë njerëz me kancer të kenë qasje në opsione të personalizuara trajtimi që mund t’i ndihmojnë ata të jetojnë më gjatë dhe më mirë”, tha ajo.
Dr. Lennard Lee, një onkolog mjekësor dhe profesor i asociuar në Universitetin e Oksfordit, ishte po aq pozitiv. “Ky është sigurisht një lajm i mirë për pacientët me melanomë, por studimi ka implikime shumë më të gjera”, tha ai, duke shtuar se të dhënat janë provë e parimit se vaksinat e personalizuara kundër kancerit mund të funksionojnë.
Nëse, në fund të fundit, të dhënat e plota konfirmojnë gjetjet fillestare, kjo qasje mund të sinjalizojë një model të ndryshëm të trajtimit të kancerit, në të cilin trajtimi është hartuar rreth vetë tumorit të secilit pacient.
