Ish-ministri ukrainas i Mbrojtjes, Mykhailo Fedorov, ka bërë thirrje për zhvillimin e zgjedhjeve në Ukrainë edhe gjatë luftës, në një lëvizje që shihet si një nga sfidat më të forta ndaj presidentit Volodymyr Zelensky që prej nisjes së pushtimit të plotë rus.
“Demokracia nuk mund të mbahet peng nga Rusia”, deklaroi Fedorov, 35 vjeç, në një video të publikuar në YouTube të martën. Ai theksoi se Ukraina po lufton pikërisht për të mbetur “një shtet i lirë evropian”.
Që prej nisjes së pushtimit rus në vitin 2022, Ukraina ndodhet nën ligjin ushtarak, çka ka sjellë pezullimin e zgjedhjeve.
Fedorov, i cili nuk e përmendi drejtpërdrejt Zelenskyn në deklaratën e tij, u shkarkua papritur nga posti i ministrit të Mbrojtjes muajin e kaluar, vetëm gjashtë muaj pasi ishte emëruar në këtë detyrë.
Nga presidenca ukrainase nuk ka pasur ende një reagim zyrtar ndaj deklaratave të tij. Megjithatë, një burim në zyrën e Zelenskyt i tha BBC-së se do të ishte “shumë e çuditshme” të organizoheshin zgjedhje ndërsa vendi përballet me sulme me raketa dhe dronë, duke e cilësuar një ide të tillë si jorealiste.
Edhe analistë ukrainas kanë ngritur pikëpyetje mbi mundësinë e organizimit të zgjedhjeve në mënyrë të drejtë dhe të sigurt. Sipas tyre, një nga sfidat kryesore do të ishte përfshirja në proces e miliona ukrainasve që janë larguar nga vendi, si dhe e qindra mijëra ushtarëve që ndodhen në vijën e frontit.
Ndërkohë, Zelensky, mandati pesëvjeçar i të cilit përfundoi në maj 2024, është përballur me presion nga SHBA-ja dhe Rusia për zhvillimin e zgjedhjeve të reja në Ukrainë.
