Një ftesë dasme e publikuar në media ka shtuar edhe më shumë spekulimet se Cristiano Ronaldo dhe Georgina Rodriguez mund të kurorëzojnë së shpejti lidhjen e tyre.
Çifti është bashkë prej rreth nëntë vitesh dhe prej kohësh përflitet për martesën. Edhe pse Ronaldo e ka quajtur Georginën “bashkëshortja ime” që prej vitit 2025, ai nuk ka konfirmuar ende një datë zyrtare për ceremoninë.
Sipas mediave portugeze, emisioni V+Fama, ka siguruar një kopje të një ftese të supozuar martese, ku shkruhet: “Së bashku me familjet e tyre, Cristiano Ronaldo dhe Georgina Rodríguez kërkojnë nderin e pranisë suaj në festimin e martesës së tyre.”
Raportimet kanë bërë që shumë të besojnë se ceremonia mund të zhvillohet ditën e nesërme, megjithatë autenticiteti i ftesës është vënë në dyshim. Disa versione të saj tregojnë se ceremonia do të nisë në orën 17:00, ndërsa të tjera në 14:00, duke ngritur dyshime nëse dokumenti është i vërtetë.
Edhe lista e të ftuarve mbetet mister, por mediat spekulojnë se në ceremoni mund të marrin pjesë emra të njohur të futbollit si Kylian Mbappé, Vinícius Júnior dhe Rio Ferdinand. Gjithashtu përflitet se i ftuar mund të jetë edhe gazetari Piers Morgan.
Në një intervistë të mëparshme me Morgan, Ronaldo kishte zbuluar se dëshironte të martohej me Georginën pas përfundimit të Kupës së Botës.
“Shpresoj të shkoj në dasmën time me trofeun e kampionit. Do të martohem me të sepse besoj se është koha e duhur. Jo vetëm sepse është nëna e fëmijëve të mi, por sepse është personi që dua më shumë”, ishte shprehur ai.
Ronaldo ka treguar edhe momentin e propozimit, duke zbuluar se i kërkoi Georginës të martohej me të në vitin 2025, rreth orës 01:00 të mëngjesit.
Ndërkohë, sipas raportimeve të mediave britanike, nëse dasma zhvillohet, në mesin e të ftuarve mund të jenë edhe emra të njohur të shoëbiz-it si Esther Expósito, Vin Diesel, Jennifer Lopez, Rihanna dhe Drake.
Pak ditë më parë, Georgina publikoi në Instagram disa fotografi ku shfaqej me bizhuteri luksoze në duar, duke “ushqyer” edhe më shumë zërat për një martesë të afërt.
Për momentin, as Ronaldo dhe as Georgina nuk kanë konfirmuar zyrtarisht lajmin, ndaj mbetet për t’u parë nëse bëhet fjalë për një ceremoni të vërtetë apo vetëm për një tjetër spekulim.
