Teherani i ka kërkuar rebelëve Huthi të Jemenit të jenë gati për të mbyllur rrugën e naftës në Detin e Kuq në rast se Shtetet e Bashkuara godasin infrastrukturën energjetike iraniane.
Ideja është diskutuar brenda udhëheqjes së Republikës Islamike dhe mesazhi është përcjellë aleatëve të tyre Huthi, sipas dy burimeve të larta iraniane dhe një burimi rajonal që njihet me çështjen. Të tre folën në kushte anonimiteti, transmeton Reuters.
Sipas Agjencisë Reuters, Huthitë janë informuar kohët e fundit për kërkesën e Teheranit, gjë që nuk është raportuar më parë.
Ata nuk dhanë detaje të mëtejshme se si është përcjellë mesazhi apo nëse kjo ka ndodhur pas kërcënimit të Presidentit amerikan Donald Trump të martën për të sulmuar infrastrukturën energjetike të Iranit.
Ministria e Jashtme e Iranit dhe një zëdhënës i grupit Huthi nuk ishin të disponueshëm menjëherë për të komentuar.
Një burim i afërt me Huthitë tha se grupi ka përfunduar përgatitjet për të sulmuar anijet duke vendosur raketa dhe dronë pranë ngushticës Bab el-Mandeb, hyrjes në Detin e Kuq në malësitë e Jemenit që mbikëqyrin Hodeidah dhe Gjirin e Adenit. Ata tani presin urdhrin për të filluar.
Çdo kërcënim ndaj Detit të Kuq dhe ngushticës Bab el-Mandeb rrezikon të përkeqësojë rëndë krizën globale energjetike të shkaktuar nga mbyllja e Ngushticës së Hormuzit nga Irani, duke theksuar rreziqet shpërthyese që vijnë nga një raund i ri luftimesh në rajon.
