Kalueshmëri më e lartë dhe më shumë nota maksimale: Matura Shtetërore 2026 shënoi rezultate më të mira se një vit më parë. Kështu deklaroi ministrja e arsimit Mirela Kumbaro, e cila theksoi se provimet u zhvilluan në një process të rregullt, me kushte të barabarta për të gjithë maturantët.
“Për sa i takon rezultateve paraprake, kemi një lajm pozitiv, që në të gjitha provimet kemi një rritje të kalueshmërisë së maturantëve. Jo vetëm kaq, por edhe një numër më të lartë të vlerësimeve maksimale, me notën 10. Ndërkohë norma e maturantëve që nuk kanë kaluar me sukses të paktën një prej provimeve, varion nga 0.98% në lëndët me zgjedhje deri maksimalisht në 2,5% në provimin e matematikës”, tha Kumbaro.
Vëmendje iu kushtua edhe rasteve të shkeljes së rregullores. Kumbaro bëri të ditur se 31 maturantë u përjashtuan nga provimet pasi tentuan të kopjonin.
“Keqardhje për 31 maturantë që në përputhje me rregulloren u përjashtuan nga provimi, por për fat të mirë, falë reagimit dhe trajtimit në kohë rekord, këto përpjekje nuk cenuan procesin e testimeve në nivel kombëtar”, tha Kumbaro.
Në përfundim, ministrja Mirela Kumbaro, u bëri thirrje maturantëve të ndjekin kalendarin e pranimeve në universitete. Nga 27 korriku deri më 1 gusht, ata do të kenë mundësinë të përzgjedhin dhjetë programet e studimit përmes portalit “U-Albania”.
