Bilanci i viktimave nga dy tërmetet e fuqishme që goditën Venezuelën është rënduar ndjeshëm. Pasi fillimisht autoritetet raportuan për 32 viktima, presidentja në detyrë Delcy Rodríguez bëri të ditur se numri i të vdekurve ka arritur në 164, ndërsa 971 persona kanë mbetur të plagosur.
Dy tërmetet me magnitudë 7.2 dhe 7.5 goditën vendin mbrëmjen e së mërkurës, duke shkaktuar dëme të mëdha në disa shtete. Epiqendra u regjistrua pranë qytetit Morón, rreth 170 kilometra në perëndim të Karakasit. Lëkundjet, ndër më të fortat në më shumë se një shekull, u ndjenë edhe në vende të tjera të rajonit, deri në Brazil dhe Kolumbi.
Zona më e goditur rezulton shteti La Guaira, i cilësuar nga autoritetet si një “zonë katastrofe”. Dhjetëra ndërtesa janë shembur, ndërsa ekipet e kërkim-shpëtimit po vijojnë operacionet intensive për gjetjen e të mbijetuarve nën rrënoja. Pamjet e transmetuara nga mediat lokale tregojnë ndërtesa të shkatërruara, rrugë të bllokuara dhe banorë që kërkojnë familjarët e tyre mes gërmadhave.
Në Karakas, mijëra banorë kaluan natën jashtë banesave nga frika e pasgoditjeve. Disa zona mbetën pa energji elektrike dhe sinjal telefonik, ndërsa aeroporti kryesor i vendit, Simón Bolívar, u mbyll për shkak të dëmtimeve të shkaktuara nga tërmeti. Autoritetet kanë pezulluar gjithashtu mësimin dhe kanë shndërruar disa shkolla në strehimore për të prekurit.
Ndërkohë, ndihmat ndërkombëtare kanë nisur të mbërrijnë në Venezuelë. Shtetet e Bashkuara, Ekuadori, Katari, Meksika dhe El Salvadori kanë ofruar asistencë humanitare dhe ekipe shpëtimi, ndërsa operacionet në terren vijojnë mes frikës se numri i viktimave mund të rritet edhe më tej.
/vizionplus.tv
