Policia e Malit të Zi ka arrestuar Besnik Kolndreun, 40-vjeçarin e shpallur në kërkim lidhur me ngjarjen e ndodhur më 26 prill ku u vranë me armë zjarri Gentjana dhe Kreshnik Mujeci, bashkëshortë.
40-vjeçari akuzohet për veprën penale “Përkrahja e autorit të krimit”, kryer në bashkëpunim.
Kolndreu ishte shpallur në kërkim në zbatim të vendimit të Gjykatës së Lezhës, e cila i kishte caktuar masën e sigurisë “Arrest në burg”.
Nga veprimet hetimore të kryera ka rezultuar se Besnik Kolndreu dyshohet se ka ndihmuar autorët e kësaj ngjarjeje, duke fshehur në banesën e tij automjetin e përdorur prej tyre pas kryerjes së krimit. Automjeti u gjet dhe u sekuestrua nga shërbimet e Policisë gjatë kontrolleve të kryera në kuadër të hetimeve.
Kreshnik Mujeci, 39 vjeç dhe Gentjana Mujeci u ekzekutuan në një atentat mafioz më 26 prill 2026, në zonën e Balldrenit. Autorët i zunë pritë makinës së tyre dhe qëlluan me breshëri plumbash.
Ngjarja rezultoi të ishte e organizuar për hakmarrje. Policia e Shtetit identifikoi tre autorë të dyshuar: Renato Mhillaj, Adriano Mhillaj dhe Florin Mhillaj. Atentatori kryesor dyshohet se kreu krimin për të marrë hakun e babait të tij, për vrasjen e të cilit 10 vite më parë akuzohej Kreshnik Mujeci.
Tre personat, të cilët dyshohet se janë autorë të ngjarjes vijojnë të jenë ende në kërkim.
