Policia e Tiranës ka arrestuar rojën e sigurisë së bankës që u grabit një ditë më parë pranë zonës së Komunës së Parisit. Sipas burimeve, ai akuzohet se nuk ka vepruar në momentin e grabitjes për të neutralizuar autorin dhe për të parandaluar kryerjen e krimit.
Nga hetimet paraprake rezulton se grabitësi ka arritur t’i marrë me forcë rreth 10 mijë paund një qytetareje që ndodhej në ambientet e bankës duke kryer një depozitim. Po ashtu, autori ka mundur të marrë edhe një shumë parash nga arka e institucionit bankar.
Deri më tani nuk është bërë e ditur shuma totale e parave të grabitura, ndërsa hetuesit po vijojnë verifikimet për të përcaktuar vlerën e saktë të dëmit financiar të shkaktuar.
Ngjarja ndodhi mesditën e së martës, kur një person i maskuar, i pajisur me skafandër motori dhe i armatosur, sipas dëshmitarëve, me një armë zjarri, hyri në bankë dhe realizoi grabitjen brenda pak minutash. Më pas ai u largua me shpejtësi me një skuter, duke humbur gjurmët.
Hetimet kanë zbuluar se autori ka ndjekur itinerarin përgjatë rrugës “Sulejman Delvina” dhe dyshohet se më vonë ka braktisur mjetin në një garazh për të vijuar arratisjen në këmbë drejt zonës së Bllokut.
Ndërkohë, Policia e Tiranës po vijon kontrollet dhe analizimin e pamjeve të kamerave të sigurisë për identifikimin dhe kapjen e autorit të grabitjes, ndërsa po hetohen edhe rrethanat e rolit dhe reagimit të rojes së sigurisë gjatë ngjarjes.
