Sali Berisha ka reaguar pas shpalljes së rezultateve përfundimtare të referendumit në Partinë Demokratike, ku u rikonfirmua në krye të partisë.
Në deklaratën e tij, Berisha falënderoi demokratët për mbështetjen dhe votëbesimin, duke e cilësuar procesin si një shprehje të standardit demokratik brenda partisë.
“Jam këtu para së gjithash për të shprehur mirënjohjen time më të pakufishme, nderimin më të thellë për të gjithë ata demokrate e demokratë që sot votuan për riafirmimin tim në një votëbesim masiv në krye të Partisë Demokratike”, u shpreh Berisha.
Ai pati gjithashtu një mesazh edhe për ata anëtarë që votuan kundër ose abstenuan, duke deklaruar se vota e tyre do të merret në konsideratë.
“I garantoj se vota e tyre ndryshe, apo kundër, apo abstenim qoftë, do mbahet shënim dhe do bëj gjithçka për t’u dhënë përgjigje më të mirë atyre hezitimeve apo vërejtjeve”, deklaroi ai.
Berisha theksoi se Partia Demokratike është “një familje e mbrojtur në palcë me diversitetin dhe standardin demokratik”, ndërsa falënderoi komisionerët, drejtuesit politikë dhe strukturat e partisë për organizimin e procesit në të gjithë vendin.
Sipas Albana Vokshit, kryetares së Komisionit të Operacioneve Elektorale në PD në zgjedhje morën pjesë 39441 demokratë. Nga këto rezultuan 38,902 vota të vlefshme, 539 të paflefshme.
Nga votat e vlefshme, vota pro kryetarit Sali Berisha ishin 37,341, vota kundër 1,055, ndërsa abstenim 506.
