Ministri i Punëve të Brendshme, Besfort Lamallari, ka bërë të ditur se brenda vitit të ardhshëm do të nisë zbatimi i projektit “Smart City” në disa shkolla në Tiranë, si pjesë e masave për rritjen e sigurisë në institucionet arsimore.
Në një konferencë për media, Lamallari tha se projekti synon të ndryshojë mënyrën e menaxhimit të sigurisë në shkolla përmes teknologjisë së avancuar dhe mbikëqyrjes elektronike.
“Kemi 330 efektivë që bashkëpunojnë me Policinë e Shtetit. Përmenda projektin Smart City. Është projekt që ndryshon faqen e historisë së sigurisë në Shqipëri”, u shpreh ministri.
Ai shtoi se sistemi do të ndihmojë në identifikimin e situatave të rrezikshme, përfshirë raste kur nxënësit mund të mbajnë mjete prerëse, duke sinjalizuar në kohë institucionet përkatëse.
“Brenda vitit të ardhshëm do të kemi zbatimin e këtij projekti në 21 shkolla në Tiranë”, theksoi Lamallari.
Ministri u ndal gjithashtu te masat për sezonin e verës, duke theksuar se është hartuar një plan i posaçëm për parandalimin e zjarreve, përfshirë edhe raste të zjarrvënieve të qëllimshme.
“Ministria e Brendshme ka hartuar një plan masash. Në fokus mbetet parandalimi i rasteve të zjarrit, mbrojtja e jetës, pronës dhe mjedisit”, tha ai.
Sipas tij, po forcohet bashkëpunimi me bashkitë dhe autoritetet vendore, ndërsa kontrollet do të vijojnë në hotele, bare dhe restorante me fluks të lartë qytetarësh, me qëllim garantimin e një turizmi më cilësor dhe më të sigurt.
