Një operacion i Policisë në aksin Mamurras–Laç ka përfunduar me plagosjen e një 23-vjeçari të shpallur në kërkim dhe arrestimin e Amadeo Fufit, djali i ish-deputetit të PD-së, Mhill Fufi.
Sipas njoftimit zyrtar të Policisë, efektivët kishin siguruar informacion mbi vendndodhjen e Leonard Demës, 23 vjeç, lindur në Mamurras, i dënuar me 7 vite burg nga Gjykata e Trentos në Itali për tentativë vrasjeje.
Lexo edhe :
Related Posts
Gjatë ndërhyrjes së forcave operacionale pranë një karburanti në aksin Mamurras–Laç, Dema ndodhej në një automjet së bashku me Amadeo Fufin, 28 vjeç. Sipas Policisë, i riu ka tentuar të përplasë me makinë efektivët, duke rrezikuar jetën e tyre.
Policia thekson më tej se Amadeo Fufi ka nxjerrë një armë zjarri pistoletë dhe e ka drejtuar në drejtim të uniformave blu.
Në kushtet e vetëmbrojtjes, efektivët kanë ndërhyrë për neutralizimin e situatës, ku si pasojë mbeti i plagosur Leonard Dema. Ai u transportua menjëherë drejt Spitalit të Traumës dhe ndodhet nën kujdesin e mjekëve.
Ndërkohë, Amadeo Fufi u arrestua në flagrancë, ndërsa gjatë operacionit u sekuestrua edhe arma e zjarrit që ai posedonte.
