Ministri i Punëve të Brendshme, Besfort Lamallari, në një konferencë për media ka prezantuar prioritetet dhe masat konkrete për garantimin e sigurisë gjatë sezonit turistik, forcimin e kontrollit mbi territorin si dhe rritjen e efikasitetit të institucioneve ligjzbatuese.
Duke iu referuar operacioneve të fundit, ministri tha se gjatë vizitës në Sarandë janë evidentuar raste të dyshuara paligjshmërie, ku janë përfshirë edhe punonjës të policisë në veprimtari kriminale.
“Jeni në dijeni për vizitën time në Sarandë, ku nga hetimet paraprake u bë e mundur goditja e një rasti të dyshuar paligjshmërie, ku punonjës policie bëhen palë me krimin”, u shpreh Lamallari, duke theksuar se bregdeti nga veriu në jug është një pasuri kombëtare që duhet mbrojtur.
Ai shtoi se do të ketë hetim të thelluar për rastet e konstatuara dhe paralajmëroi se institucionet do të veprojnë pa tolerancë ndaj shkeljeve.
“Mesazh për këdo tjetër: llogaritë duhet t’i bëjë mirë. Nuk do të tolerohet asnjë rast”, theksoi ministri, duke vënë në dukje edhe intensifikimin e masave nga Inspektorati Kombëtar i Mbrojtjes së Territorit për goditjen e ndërtimeve pa leje dhe krimeve mjedisore.
Duke folur për sezonin turistik, Lamallari tha se janë marrë masa të shtuara për garantimin e sigurisë së pushuesve, përmes rritjes së pranisë policore në zonat bregdetare dhe malore.
“Kemi parë nga viti në vit fluks të pushuesve. Policia e Shtetit dhe strukturat e tjera kanë marrë masat për garantimin e sigurisë dhe mikpritjes në territor. Do të ketë patrullime të veçanta dhe 12-orëshe”, u shpreh ai.
Ministri shtoi se po forcohet edhe funksionimi i Policisë Detare dhe Kufitare, me fokus të veçantë sigurinë në plazhe dhe zonat turistike, ndërsa vlerësoi rritjen e kapaciteteve policore në përgjithësi.
Një tjetër masë e përmendur ishte bashkëpunimi ndërkombëtar në luftën kundër kultivimit të kanabisit, ku sipas Lamallarit do të përdoren edhe mjete ajrore për monitorim në kohë reale.
“Do të kemi përdorimin edhe të një avioni, i cili do të përcjellë në kohë reale koordinatat e sakta”, tha ai, duke theksuar bashkëpunimin me autoritetet italiane.
Në fund, ministri ndaloi edhe te masat për sigurinë në shkolla, duke deklaruar se Policia e Shtetit është në gatishmëri dhe po zbatohen kontrolle të posaçme dhe programe ndërgjegjësimi për të rinjtë.
“Është bërë me dije edhe më herët, janë planifikuar dhe po zbatohen masa të posaçme për incidentet në shkolla. Policia e Shtetit është në alert”, përfundoi Lamallari.
