Kryeministri Edi Rama u është përgjigjur deklaratave të ish-kryeministrit Sali Berisha lidhur me nivelin e integritetit në prokurimet publike në Shqipëri.
Rama ka hedhur poshtë pretendimet për rënie të standardeve në këtë fushë, duke thënë se Shqipëria është përfshirë për herë të parë në një portal europian të matjes së integritetit të prokurimeve dhe se, sipas tij, ka dalë me rezultate më të mira se disa vende të Bashkimit Europian.
Lexo edhe :
Related Posts
Ai ka theksuar gjithashtu se sistemi i prokurimeve publike në vend ka njohur përmirësime të vazhdueshme dhe se qeveria synon rritje të mëtejshme të transparencës përmes digjitalizimit dhe përdorimit të teknologjisë së re.
Në reagimin e tij, Rama është shprehur gjithashtu se zhvillimet në këtë fushë do të vijojnë me përfshirjen e zgjidhjeve të bazuara në inteligjencën artificiale, me synimin për të rritur efikasitetin dhe shpejtësinë e proceseve të prokurimit publik.
Edi Rama: Hedh budallai i madh një gur në lumë dhe pastaj të vegjlit bëjnë si të mençur për ta nxjerrë, duke thënë që integriteti i prokurimeve publike në Shqipëri paska shënuar rënie! Po se si e shënoi këtë rënie, kur në fakt Shqipëria u përfshi për herë të parë në portalin europian të matjes së integritetit të prokurimeve për shtetet e Bashkimit Europian, duke dalë më mirë se sa shumë prej tyre, këtë as i madhi e as të vegjëlit nuk kanë se si e thonë, sepse budallallëku ka kufi vetëm vetveten. Rëndësi ka që duan s’duan ata që s’duan, sot Shqipëria vlerësohet ndërkombëtarisht si asnjëherë më parë, edhe në fushën e prokurimeve, ku kemi bërë progres të madh dhe jemi ende në ngjitje, sepse me Diellën në prokurimet publike do të arrijmë brenda këtij mandati, një nivel integriteti e shpejtësie që do të na rendisë në nivelin më të lartë europian, falë Inteligjencës Artificiale.
Çfarë deklaroi Sali Berisha
Njeriu që në çdo fjali nxjerr një gënjeshtër është bërë barsoletë e vërtetë në Shqipëri, në Evropë dhe më gjerë.
Edi Rama doli dje me shifra dhe statistika para, rrahu gjoksin për prokurimet transparente me pretendimin se ato kanë shënuar përmirësime spektakolare duke qenë i paaftë të lexojë shifrat, t’i interpretojë grafiqet, tabelat e institucioneve kombëtare dhe ndërkombëtare që faktojnë absolutisht të kundërtën.
Shqipëria, siç dihet, është vendi i parë në botë që aplikoi sistemin dixhital të prokurimeve, për çka në vitin 2010, OKB i akordoi Shqipërisë, pasi BB certifikoi këtë sistem, i akordoi çmimin e dytë në botë për transparencën në shërbimin civil.
Ky sistem në vitin 2010-2011-2012, pra integriteti i prokurimeve publike ishte 80 përqind. Vlerësohej me 80 përqind.
Integriteti i prokurimeve publike pas kësaj periudhe ka rënë në një mesatare 70 përqind. Ka rënë me 10 pikë dhe jo vetëm kaq, por në vitin 2026, kjo rënie është në 66 pikë, është një rënie prej 14 pikësh.
Një rënie dramatike.
Shkaqet do i shohim më poshtë.
Pra, e kuptoni. Sistemi i vendosur në vitin 2010, që në vitet e para kishte treguesin e integritetit 80 përqind, dhe në vend se të njihte përmirësime, sepse sigurisht teknologjia e vitit 2026 është më e avancuar dhe lejon mundësi më të madhe, jo vetëm që nuk njohu përmirësim, por njohur përkeqësim progresiv.
