Gjatë këtij sezoni veror, pushuesit në Velipojë do të kenë mundësi të zgjedhin mes hapësirës publike, asaj private dhe hapësirës që do të menaxhohet nga bashkia.
“Bashkive u jepet e drejta që sipërfaqet e plazheve publike t’i menaxhojnë ata me pagesë. 30% e plazhit do të jetë pa pagesë, ndërkohë bashkitë kanë edhe të drejtën të menaxhojnë plazhe me çmime modeste. Pushuesit do të kenë 3 mundësi: plazh pa pagesë, plazh me pagesë dhe e menaxhuar nga bashkia dhe plazhet private”, sqaron Bekim Mema, drejtor i Zhvillimit të Qëndrueshëm Ekonomik, Bashkia e Shkodrës.
Në stacionet e plazheve që do të menaxhohen nga bashkia, turistët do të gjejnë çadra kundrejt një pagese jo më shumë se 500 lekë.
“Do të kemi 3 stacione plazhi të menaxhuara nga ana e bashkisë, në Velipojë dhe një në Rrjoll, çmimet do të variojnë 400-500 lekë”, thotë Mema.
Çdo stacion plazhi i menaxhuar nga bashkitë do të ketë një tabelë informuese, ndërsa sipas rregullores, ato duhet të jenë të pajisur edhe me kabina zhveshjeje, dushe dhe kosha për mbeturina.
