Presidenti francez Emmanuel Macron u ka bërë thirrje Shteteve të Bashkuara dhe Iranit që të shmangin përshkallëzimin e mëtejshëm të situatës, pas tensioneve të rritura gjatë fundjavës në Ngushticën e Hormuzit.
Gjatë një konference të përbashkët për shtyp me kryeministrin polak Donald Tusk, Macron theksoi se zgjidhja duhet të vijë përmes dialogut dhe diplomacisë.
“Qëndrimi ynë mbetet i njëjtë. Duhet t’i zgjidhim çështjet përmes diplomacisë. Të gjithë duhet të qetësohen”, deklaroi ai.
Presidenti francez sqaroi gjithashtu se Franca nuk ka qenë objektiv specifik i incidenteve në ngushticë, pasi Irani hapi zjarr ndaj disa anijeve të shtunën. Mes tyre ishte edhe një anije kontejnerësh që i përket kompanisë franceze CMA CGM.
Kompania e transportit detar i përshkroi të shtënat si “të shtëna paralajmëruese”, duke bërë të ditur se ekuipazhi në bord ishte i sigurt.
Tensionet në një nga rrugët më të rëndësishme detare në botë kanë rritur shqetësimet për sigurinë dhe stabilitetin në rajon.
