Çmimet globale të naftës u rritën ndjeshëm në tregjet aziatike të hënën në mëngjes, pasi presidenti amerikan Donald Trump deklaroi se SHBA ka interceptuar dhe sekuestruar një anije mallrash me flamur iranian. Ky zhvillim vjen në një moment tensionesh të larta në rajon, që kanë ndikuar drejtpërdrejt në tregjet energjetike.
Situata u përshkallëzua më tej pasi Irani njoftoi të shtunën mbylljen e Ngushticës së Hormuzit për anijet tregtare, duke paralajmëruar se çdo mjet që afrohet do të konsiderohet objektiv. Si pasojë, nafta Brent u rrit me 4.74%, duke arritur në 94.66 dollarë për fuçi, ndërsa West Texas Intermediate u rrit me 5.6%, në 88.55 dollarë.
Tregjet e energjisë kanë pësuar luhatje të forta që prej sulmeve të SHBA-së dhe Izraelit ndaj Iranit më 28 shkurt, si dhe reagimeve të Teheranit për të goditur transportin detar në këtë zonë strategjike. Rreth 20% e furnizimit global me naftë dhe gaz natyror të lëngshëm kalon përmes kësaj ngushtice.
Ndërkohë, presidenti Trump ka bërë të ditur se përfaqësues amerikanë do të zhvillojnë bisedime në Pakistan, të udhëhequra nga zv/presidenti JD Vance. Megjithatë, media shtetërore iraniane ka raportuar se Teherani nuk ka plane të menjëhershme për të marrë pjesë në negociata.
Ekspertët theksojnë se paqëndrueshmëria në tregjet e naftës lidhet jo vetëm me zhvillimet reale në terren, por edhe me deklaratat politike dhe tensionet në rritje. Ndërkohë, kriza ka filluar të ndikojë në furnizimin global me energji, veçanërisht në Azi, e cila mbështetet në masë të madhe tek kalimi përmes Ngushticës së Hormuzit.
/vizionplus.tv
