Numri i ushtarëve ukrainas të vrarë në fushën e betejës në katër vitet e luftës me Rusinë është 55,000, tha Presidenti Volodymyr Zelensky.
Përveç kësaj, një numër i madh njerëzish konsiderohen zyrtarisht të zhdukur, tha ai.
Ndërsa si Kievi ashtu edhe Moska kanë publikuar rregullisht vlerësime të humbjeve të palës tjetër, ato kanë hezituar të japin detaje për të vetat.
Presidenti i SHBA-së, Donald Trump, ka udhëhequr përpjekjet për t’i dhënë fund luftës që filloi me pushtimin në shkallë të plotë të fqinjit të saj nga Rusia më 22 shkurt 2022.
Të dërguarit specialë amerikanë, Steve Witkoff dhe Jared Kushner, dhëndri i Trump, zhvilluan bisedime me negociatorët rusë dhe ukrainasë në kryeqytetin e Emirateve të Bashkuara Arabe, Abu Dhabi, të enjten, në një përpjekje për të diskutuar detajet e marrëveshjes së paqes të propozuar nga SHBA-të.
Ishte takimi i dytë i tillë trepalësh dhe bisedimet kishin qenë “të detajuara dhe produktive”, shkroi Steve Witkoff në X, por “mbetet punë e rëndësishme për t’u bërë”.
Çështja më e vështirë është territori, me Rusinë që kërkon që Ukraina të lëshojë pjesën tjetër të rajonit lindor industrial të Donbasit, të cilin Moska aktualisht nuk e kontrollon.
Herën e fundit që Zelensky dha një përditësim mbi viktimat e Ukrainës ishte në dhjetor 2024, kur ai tha se kanë humbur jetën 43,000.
Në intervistën e tij me televizionin francez, ai tha: “Në Ukrainë, zyrtarisht numri i ushtarëve të vrarë në fushën e betejës – qoftë profesionistë apo të rekrutuar – është 55,000.”
