Izraeli ka bombarduar sërish Rripin e Gazës. Për pasojë, të paktën 30 persona kanë mbetur të vrarë. Sipas mediave, viktimat janë regjistruar jashtë zonave të përcaktuara nga marrëveshja e armëpushimit e 10 tetorit.
Pavarësisht armëpushimit, ushtria izraelite goditi një stacion policie në lagjen Sheikh Radëan, në perëndim të qytetit të Gazës, duke vrarë 10 oficerë dhe të ndaluar, tha mbrojtja civile. Kjo tregon se numri i të vdekurve mund të rritet, ndërsa ekipet e emergjencës po vijojnë të kërkojnë trupa.
Një tjetër sulm goditi një apartament në qytet, duke vrarë tre fëmijë dhe dy gra, ndërsa shtatë persona të tjerë u vranë kur Tel Avivi bombardoi tendat në Khan Younis, në jug të Gazës.
Agjencia e mbrojtjes civile, e cila drejtohet nga Hamasi, thotë se mes të vrarëve kishte fëmijë dhe gra.
Palestinezët i kanë përshkruar këto sulme si më të rëndat që nga faza e dytë e armëpushimit, e ndërmjetësuar nga Presidenti Trump në tetor, e cila hyri në fuqi në fillim të këtij muaji.
Ushtria izraelite konfirmoi se sulmet u kryen në përgjigje të asaj që e quajti shkelje të marrëveshjes nga Hamasi të premten. Goditjet vijnë ndërsa pika kufitare e Rafah-ut pritet të rihapet nesër.
/vizionplus.tv
