Mazhoranca socialiste miratoi e vetme ndryshimin e dy ligjeve bazë të reformës në drejtësi: ligjin për statusin e gjyqtarëve dhe prokurorëve dhe ligjin për qeverisjen e organeve të sistemit të drejtësisë. Fatmir Xhafaj, kryetari i Komisionit për Mbikëqyrjen Institucionale, shpjegoi se miratimi i këtyre ndryshimeve është kërkesë e Bashkimit Evropian dhe detyrim për procesin e integrimit.
Ndryshimet synojnë të forcojnë vetingun për anëtarët jomagjistratë të Këshillit të Lartë të Prokurorisë dhe atij Gjyqësor, duke bërë që mbi ta të ushtrohet i njëjti kontroll që ushtrohet mbi prokurorët dhe gjyqtarët.
Por, për Fatmir Xhafën, i cili ka udhëhequr në emër të Partisë Socialiste reformën në drejtësi në vitet 2015–2016, këto ndryshime nuk mjaftojnë. Xhafaj ka paralajmëruar se këto ligje do të ndryshojnë sërish për t’i dhënë zgjidhje problemeve me të cilat përballet sot sistemi i drejtësisë.
Opozita e bojkotoi mbledhjen, pasi demokratët kanë marrë porosi që përgjatë gjithë kësaj jave të punojnë për organizimin e protestës së 24 janarit. Përtej kësaj, PD ka vendosur të mos bëhet pjesë e ndryshimeve në ligjet e reformës në drejtësi, pasi në këndvështrimin e saj ndërhyrja duhet të jetë më e thellë.
Të dy ligjet kërkojnë 84 vota për t’u miratuar, por PS, së bashku me PSD-në e Tom Doshit, ka 86 mandate dhe nuk ka asnjë problem për të ndryshuar ligjet e kësaj reforme.
/vizionplus.tv
