Zjarri që shpërtheu gjatë natës së Vitit të Ri në barin “Le Constellation”, brenda resortit luksoz të skive Crans-Montana në Zvicër, ka shkaktuar një tragjedi të rëndë. Deri tani raportohet për të paktën 47 viktima dhe 115 të plagosur, ndërsa mes të prekurve ka edhe shumë shtetas të huaj, përfshirë italianë, disa prej të cilëve rezultojnë ende të zhdukur. Shumica e të lënduarve janë të rinj të moshave 16–26 vjeç. Autoritetet zvicerane kanë shpallur pesë ditë zie kombëtare.
Presidenti i Konfederatës Zvicerane, Guy Parmelin, e cilësoi ngjarjen si një nga tragjeditë më të rënda në historinë e vendit. Ai vizitoi Crans-Montana-n së bashku me përfaqësues të lartë të kantonit Valais, duke shprehur solidaritetin e qeverisë me familjet e viktimave dhe të personave të zhdukur. Parmelin deklaroi se Zvicra do të bëjë gjithçka për të zbardhur shkaqet e ngjarjes dhe për të parandaluar përsëritjen e saj.
Presidenti theksoi se shumë prej viktimave janë të rinj dhe falënderoi vendet fqinje, përfshirë Italinë, Francën dhe Gjermaninë, për mbështetjen e ofruar. Ai vlerësoi gjithashtu përkushtimin e ekipeve të shpëtimit, të cilat rrezikuan jetën për të ndihmuar të plagosurit.
Sipas autoriteteve lokale, prioriteti kryesor mbetet identifikimi i viktimave, një proces që pritet të zgjasë, pasi dyshohet se shumë prej tyre janë shtetas të huaj. Përballë emergjencës u angazhuan dhjetëra ambulanca, helikopterë dhe mbi 150 shpëtimtarë, ndërsa të plagosurit u dërguan në spitale të ndryshme të vendit.
Nga ana e saj, Italia konfirmoi se 12 deri në 15 shtetas italianë janë të shtruar në spitale zvicerane, disa në gjendje të rëndë, ndërsa 16 të tjerë rezultojnë të zhdukur. Disa prej të plagosurve do të transferohen për trajtim në Itali.
Hetimet paraprake flasin për një fenomen të quajtur “flashover”, ku zjarri u përhap shumë shpejt duke përfshirë të gjithë ambientin. Autoritetet kanë përjashtuar mundësinë e një akti të qëllimshëm. Ndërkohë, aktivitetet festive në resort janë anuluar dhe komuniteti lokal ka vendosur lule dhe mesazhe ngushëllimi në kujtim të viktimave.
/vizionplus.tv
