Ministria e Mbrojtjes ka bërë përditësimin e situatës së zjarreve në vend deri në orën 20:00, ku janë regjistruar gjithsej 27 vatra zjarri. Prej tyre, 8 mbeten aktive, ndërsa 4 të tjera janë nën monitorim.
Në operacionet për shuarjen e flakëve janë angazhuar 487 forca operacionale dhe 30 automjete zjarrfikëse. Në mbështetje të tyre janë vendosur edhe 100 efektivë të Forcave të Armatosura, 2 automjete zjarrfikëse, 3 helikopterë dhe 2 avionë Air Tractor.
Vatrat kryesore aktive janë në Dajt, Gurë-Lurë, Qafë Helmes, Bruç, Lufaj, Fushë-Lajë dhe Rrjoll. Në Dajt vijon ndërhyrja me 50 efektivë të FA dhe dy helikopterë, ndërsa sipas autoriteteve nuk paraqitet rrezik për zonat e banuara.
Në Gurë-Lurë po vijon një operacion i gjerë me forca bashkiake, MZSH, Policinë, ADZM, vullnetarë dhe 50 efektivë të FA, të mbështetur nga dy avionë Air Tractor. Korridoret e hapura në terren kanë ndihmuar në frenimin e përhapjes së flakëve drejt banesave dhe aktualisht nuk raportohet rrezik për zonat e banuara.
Në Lufaj, Mirditë, vijon puna e forcave në terren, e mbështetur nga një helikopter i FA. Ndërkohë, zjarri në Tharrë është vënë nën kontroll.
Në Zhejë të Kurbinit, zjarri është fikur plotësisht pas ndërhyrjes së MZSH-së, forcave bashkiake, Policisë dhe një helikopteri të Forcave të Armatosura.
Në Fushë-Lajë të Pukës, zjarri mbetet aktiv, por me intensitet të ulët dhe pa rrezik për zonat e banuara. Ndërsa në Rrjoll, situata po monitorohet nga afër, përfshirë edhe përmes përdorimit të dronëve.
Autoritetet vijojnë operacionet në terren për izolimin dhe shuarjen e vatrave aktive, ndërsa monitorimi i zonave me rrezik mbetet në fokus të strukturave të emergjencave.
