Ukraina ka ndërmarrë një nga sulmet më të mëdha me dronë ndaj territorit rus që prej nisjes së luftës, duke lëshuar qindra mjete ajrore pa pilot drejt disa rajoneve të Rusisë.
Sipas autoriteteve ruse, sulmet kanë shkaktuar të paktën shtatë viktima, ndërsa Ministria e Mbrojtjes në Moskë pretendon se gjatë natës janë neutralizuar 822 dronë ukrainas.
Kryebashkiaku i Moskës, Sergei Sobyanin, deklaroi se rreth 600 dronë kishin në shënjestër kryeqytetin rus. Një pjesë e tyre, sipas tij, u rrëzuan mbi rajonin e Moskës. Në një prej incidenteve, një 83-vjeçar humbi jetën pasi një dron goditi një banesë private.
Sulmet kanë shkaktuar dëme edhe në disa zona të tjera të Rusisë. Në Podolsk, një magazinë në pronësi të kompanisë ruse Wildberries u përfshi nga flakët.
Ndërkohë, në rajonin e Rostovit, autoritetet raportuan një sulm me më shumë se 150 dronë, ku mbetën të vrarë pesë persona. Sulmi shkaktoi dëme në banesa dhe në një stacion hekurudhor, ndërsa një zonë pyjore u përfshi nga zjarri.
Ushtria ukrainase konfirmoi se kishte goditur fabrikën “Kamensky” në rajonin e Rostovit, duke e përshkruar atë si një objekt të rëndësishëm të industrisë ushtarake ruse, që furnizon me produkte forcat e armatosura të Moskës.
Edhe Rusia vijon sulmet ndaj Ukrainës
Ndërkohë, Rusia ka vazhduar sulmet ajrore ndaj territorit ukrainas.
Presidenti ukrainas Volodymyr Zelensky deklaroi se një sulm me raketa në Kryvyi Rih shkaktoi dy viktima dhe 14 të plagosur. Një tjetër person humbi jetën në rajonin e Sumy.
Në Kiev, sulmet ruse shkaktuan zjarre në disa zona dhe plagosën gjashtë persona.
Sulmet e ndërsjella ajrore zhvillohen në një kohë kur Ukraina ka intensifikuar përdorimin e dronëve dhe raketave me rreze të gjatë kundër objektivave ushtarake dhe energjetike në territorin rus, ndërsa Moska vijon goditjet ndaj qyteteve dhe infrastrukturës së Ukrainës.
/vizionplus.tv
