Kryetari i Partisë Demokratike, Sali Berisha, iu drejtua protestuesve mbrëmjen e sotme në protestën kombëtare të zhvilluar përballë Kryeministrisë, ku akuzoi kryeministrin Edi Rama se ka shndërruar zgjedhjet në farsë elektorale dhe se ka vendosur veten mbi ligjin dhe Kushtetutën.
Kreu i PD tha se sot janë mbledhur në një moment, sipas tij, kritik për vendin.
Berisha: Ju flas sot në një nga momentet më kritike të historisë së kombit. Në 10 vitet e fundit janë pakësuar më shumë se nga çdo epidemi, nga çdo pushtim, zi buke dhe çdo gjë tjetër. Shqiptarët kanë shkuar mbrapa 100 vite për lindshmërinë e tyre. Sot ata kanë humbur mbi gjysmën e rinisë së vet. Kanë humbur të ardhmen dhe çdo vit bëhen gjithnjë e më pak në këtë dhe të bekuar. Ne mblidhemi në një moment kritik sepse Edi Rama pasi shndërroi zgjedhjet në farsë elektorale, del se ka vendosur të bëhet multimiliarder me paratë tuaja, me pasuritë tuaja publike. Ai ka vendosur veten mbi ligjin, mbi Kushtetutën. Ka vendosur veten mbi çdo pushtet dhe na thotë ‘se unë ju shumëzoj me zero, se unë jam mbi ligjin dhe kushtetutën’. Edi Rama hidhi sytë këtij Bulevardi. Nga sonte nuk do njihesh as në Shqipëri as në botë si kryeministrë por si kapobandë.
