UEFA Champions League rikthehet sonte në Tring me një pjesë të dueleve të javës së dytë të fazës së ligës. Shumë prej skuadrave të mëdha të kontinentit zbresin në fushën e lojës me objektivin për të koleksionuar të tjera pikë të çmuara në renditjen e përgjithshme të këtij minikampionati.
Gjithçka nis në 18:45 me dy sfida. Reali, rekordmen i Europës, udhëton në transfertën më të largët të Champions, në Kazakistan, për të luajtur ndaj Kairat Almaty, ekip debutues këtë sezon në këtë fazë të këtij turneu. Për kazakët, të cilët u mundën ndaj Sporting Lisbonë në ndeshjen e parë, kjo është një ndeshje historike, e kërkesa për bileta për sot ndaj Realit ka kaluar shifrën 300 mijë.
Ndërsa Reali, që mundi me vështirësi Marsejën në takimin e parë, synon të marrë fitoren e radhës, por edhe të kthehet te suksesi pas humbjes në derbi në La Liga.
Përballja tjetër e orës 18:45 është ajo mes Atalantës dhe Club Brugge, me belgët që kanë 3 pikë, ndërsa italianët duan fitoren e parë.
Në mbrëmje, ora 21:00, zbresin në fushë të tjerë pretendentë të mëdhenj. Në Stamboll do të jetë një nga duelet më të zjarrta të mbrëmjes, edhe në të kaluarën një sfidë me risk të lartë incidentesh mes tifozerive, ajo mes Galatasarayt dhe Liverpoolit.
Skuadra turke ka bërë shumë investime dhe në organikë ka emra si Osimhen, Ikardi apo Leroy Sane, mirëpo Liverpooli është favorit për Champions-in dhe dëshiron madje të bëjë autokritikë edhe për humbjen e fundit në kampionat ndaj Kristal Palas.
Interi, sakaq, pret në shtëpi Slavian e Pragës, rival modest që në letër është mjaft i kalueshëm për zikaltrit. Paradoksalisht, Slavia e Pragës është ekipi që i ka shkaktuar Interit humbjen më të rëndë në Europë, 9 me 0 në Kupën e Europës Qendrore në vitin 1938, megjithëse bëhet fjalë për një tjetër epokë, e një tjetër futboll.
81 vite më vonë, në 2019, Inter e mundi Slavian në Pragë 3 me 1, ndërsa në San Siro u mbyll 1 me 1. Trajneri Kivu është gati për një rotacion në organikë për takimin e sotëm, me emra si Zomer, Acerbi, Dumfries, Di Marko, Sucic, gati për të luajtur titullarë në raport me duelin ndaj Kaljarit. Zikaltrit fituan ndaj Ajaksit dhe nuk mund të gabojnë këtë ndeshje.
Edhe Bajerni kërkon suksesin e dytë në po kaq ndeshje. Pasi mundën Chelsean në shtëpi, gjermanët sonte luajnë në Qipro ndaj Pafos, të cilët në takimin e parë në derbin ndaj Olimpiakos u ndalën në barazim 0 me 0. Bajerni është një makineri golash edhe në Bundesligë, e udhëhequr nga Harry Kane.
Interesante janë edhe sfidat e tjera Atletico Madrid vs Ajntraht Frankfurt apo Chelsea-Benfica. Të gjitha ndeshjet në dy orare transmetohen në Tring.
/vizionplus.tv
