Një sërë reagimesh kanë ardhur pas nënshkrimit të një marrëveshjeje për përfundimin e luftës në Gaza, në Shtëpinë e Bardhë nga kryeministri izraelit Benjamin Netanyahu dhe presidenti amerikan Donald Trump.
Presidenti i Këshillit Evropian, Antonio Costa, tha se “të gjitha palët duhet ta shfrytëzojnë këtë moment për t’i dhënë paqes një shans të vërtetë”.
Ndërkohë, presidentja e Komisionit, Ursula von der Leyen, u shpreh se e mirëpret propozimin e paqes të Donald Trump për t’i dhënë fund luftës:
“Inkurajoj të gjitha palët që ta shfrytëzojnë tani këtë mundësi. BE-ja është e gatshme të kontribuojë. Armiqësitë duhet të përfundojnë me ofrimin e ndihmës së menjëhershme humanitare për popullsinë në Gaza dhe me lirimin e menjëhershëm të të gjithë pengjeve.”
Një apel për finalizimin e marrëveshjes erdhi edhe nga kryeministri britanik Keir Starmer:
“Ne u bëjmë thirrje të gjitha palëve të bashkohen dhe të punojnë me administratën amerikane për të finalizuar këtë marrëveshje dhe për ta bërë atë realitet. Hamasi tani duhet të bjerë dakord me planin dhe t’i japë fund mjerimit, duke ulur armët dhe duke liruar të gjithë pengjet e mbetura.”
Presidenti francez Emmanuel Macron dhe kryeministrja e Italisë Giorgia Meloni përshëndetën marrëveshjen.
Kancelari gjerman Friedrich Merz tha se Gjermania është gati të “japë një kontribut konkret në zbatimin e planit”, duke e përshkruar atë si “shansin më të mirë” për t’i dhënë fund luftës.
Ndërsa presidenti turk Erdogan përgëzoi përpjekjet e presidentit amerikan për t’i dhënë fund luftës.
“Përgëzoj përpjekjet dhe lidershipin e presidentit të SHBA-ve, Donald Trump, që synojnë ndalimin e gjakderdhjes në Gaza dhe arritjen e një armëpushimi. Turqia do të vazhdojë të kontribuojë në këtë proces me qëllim vendosjen e një paqeje të drejtë dhe të qëndrueshme, të pranueshme për të gjitha palët.”
Plani u mirëprit në parim nga udhëheqësit në Arabinë Saudite, Jordani, Emiratet e Bashkuara Arabe, Katar, Indonezi, Pakistan dhe Egjipt, të cilët thanë se ishin të gatshëm të bashkëpunonin me SHBA-në për të siguruar zbatimin e tij.
Një pjesë e mirë e propozimit amerikan i kushtohet rindërtimit të Gazës dhe një plani të detajuar ekonomik. Nëse marrëveshja nis zbatimin, palestinezët do të kenë të drejtën të zgjedhin të qëndrojnë në Gaza apo të lëvizin lirshëm, duke shkuar dhe duke u kthyer edhe në vende të tjera pritëse.
/vizionplus.tv
