21 marsi shënon çdo vit Ditën Botërore të Sindromës Down, një ditë ndërgjegjësimi e shpallur zyrtarisht nga Kombet e Bashkuara që nga viti 2012-të, me qëllim promovimin e të drejtave, përfshirjes dhe mirëqenies së personave me këtë sindromë.
Data 21.03 është zgjedhur simbolikisht për të përfaqësuar trisominë e kromozomit 21 – praninë e tri kopjeve – që është karakteristikë gjenetike e personave me sindromën Down. Vlerësohet se rreth 1 në 800 foshnja në botë lind me këtë sindromë, duke e bërë atë çrregullimin kromozomik më të zakonshëm.
Personat me sindromën Down mund të kenë disa veçori fizike dhe vonesa në zhvillimin njohës, por me mbështetjen e duhur në familje, arsim, shëndetësi dhe komunitet, ata mund të jetojnë në mënyrë aktive dhe të kontribuojnë në shoqëri. Megjithatë, në shumë vende ata ende përballen me diskriminim dhe përjashtim, duke u mohuar shpesh arsim cilësor, kujdes shëndetësor të përshtatshëm, mundësi punësimi dhe pjesëmarrje të plotë në vendimmarrje për jetën e tyre.
Tema e vitit: “Së bashku kundër vetmisë”
Tema e këtij viti thekson rëndësinë e përfshirjes reale dhe lidhjeve sociale. Personat me sindromën Down dhe familjet e tyre shpesh përjetojnë ndjenja izolimi dhe mungesë mbështetjeje. Studimet tregojnë se personat me aftësi të kufizuara intelektuale kanë shumë më tepër gjasa të ndihen të vetmuar krahasuar me pjesën tjetër të popullsisë.
Kjo ditë është një thirrje për institucionet, profesionistët dhe komunitetin që të punojnë së bashku për të krijuar mjedise gjithëpërfshirëse, ku personat me sindromën Down të ndihen të pranuar, të dëgjuar dhe pjesë aktive e shoqërisë.
