Para se shkollat shqipe në disa vende të Evropës të nisin vitin e ri mësimor, 14 mijë libra të gjuhës dhe kulturës shqiptare do të shpërndahen për mësuesit dhe nxënësit e diasporës. Librat e nivelit të parë dhe të dytë që përfshijnë nga mësimi i alfabetit, gramatikës dhe historisë do të plotësojnë nevojën që shkollat shqipe kanë nevojë për tekste.
“Përpara vitit të ri shkollor po bëjmë të mundur shpërndarjen e teksteve në diasporë. Edhe në këtë vit, në Vitin e Gjuhës Shqipe, kemi qenë të gjithë të angazhuar të ecim sa më shpejt për çfarë nevojitet, për sa i përket kompletimit me tekste të niveleve të ndryshme në gjuhën shqipe. Janë më shumë se 14 mijë tekste, të cilat janë dërguar në diasporë”, tha ministrja Manastirliu.
Grupet e ekspertëve të Shqipërisë dhe Kosovës po punojnë për nivelin e tretë të librit “Gjuha dhe kultura shqipe” ndërkohë që të parat janë të zotërueshme edhe në formatin digjital.
Tekstet mësimore për diasporën janë përpjekja e përbashkët e qeverisës së Tiranës dhe Prishtines për t’u mësuar fëmijëve të diasporës gjuhën e të parëve.
Në maj ministria e arsimit dhe sportit hapi programin “Mësues për Greqinë”, me synimin për t’u shtrirë edhe në vende të tjera ku jeton diaspora. Mësuesit me licencë që do të punësohet pranë shkollave shqipe, do të paguhen nga shteti shqiptar, të paktën për rastin e Greqisë./vizionplus.tv
