Britania mund të kufizojë stërvitjet dhe operacionet në ushtri për mungesë fondesh

Forcat e armatosura të Mbretërisë së Bashkuar mund të detyrohen të reduktojnë stërvitjet dhe operacionet ushtarake nëse nuk sigurohen fonde shtesë, ka paralajmëruar shefi i Shtabit të Mbrojtjes, Sir Richard Knighton.

Sipas tij, Plani i Investimeve në Mbrojtje nuk parashikon financime të mjaftueshme për të mbuluar aktivitetet e përditshme të ushtrisë në afat të shkurtër, duke vënë në rrezik nivelin e gatishmërisë së forcave britanike.

Paralajmërimi vjen pak ditë pas dorëheqjes së ish-ministrit të Mbrojtjes, John Healey, i cili argumentoi se fondet e propozuara nga qeveria nuk janë të mjaftueshme për t’u përballur me sfidat aktuale të sigurisë.

Në fjalën e tij para Parlamentit, Healey deklaroi se plani aktual i investimeve nuk ofron një rrugë të qartë për të arritur objektivin e rritjes së shpenzimeve ushtarake në 3% të Prodhimit të Brendshëm Bruto deri në vitin 2030, duke paralajmëruar se Britania rrezikon të mbetet pas aleatëve të saj në NATO.

Ndërkohë, Sir Richard Knighton theksoi se fondet për operacionet, stërvitjet dhe trajnimet janë jetike për ruajtjen e gatishmërisë së ushtrisë. Ai paralajmëroi se, nëse buxheti nuk rritet, do të ketë shkurtime të aktivitetit ushtarak.

“Do të na duhet të kufizojmë stërvitjet dhe operacionet nëse niveli i financimit nuk rritet”, tha ai.

Qeveria britanike ka premtuar rritjen e shpenzimeve për mbrojtjen në 3.5% të të ardhurave kombëtare deri në vitin 2035, por debati mbi financimin e ushtrisë mbetet i hapur.