Kim Jong Un i Koresë së Veriut dhe Vladimir Putin i Rusisë në samitin e parë të zhvilluar mes tyre kanë rënë dakord që të rrisin lidhjet mes dy vendeve.
Në takimin e parë të zhvilluar në lindjen e largët të Rusisë në Ishullin Russky pranë qytetit port të Vladivostok, të dy liderat shtrënguan duart me njëri-tjetrin.
Kremlini tha se udhëheqësit do të diskutojnë për denuklearizimin, por Kim gjithashtu pritet të kërkojë mbështetje nga Rusia pas bisedimeve të dështuara me SHBA.
Në fjalën e tyre të hapjes, Putin dhe Kim iu referuan historisë së gjatë të lidhjeve të dy vendeve të tyre nga ku presidenti rus tha se donte që të ndihmonte në qetësimin e tensioneve mes dy koreve.
“Unë jam i bindur që vizita juaj sot në Rusi do të na ndihmojë të kuptojmë më mirë se si mund ta zgjidhim situatën në gadishullin Korean dhe çfarë mund të bëjë Rusia për të mbështetur proceset pozitive që po ndodhin aktualisht”, tha Putin.
Kurse lideri korean u shpreh se donte “një takim shumë të dobishëm në zhvillimin e marrëdhënieve mes dy vendeve, të cilët kanë një miqësi të gjatë dhe histori, në një mënyrë më të qëndrueshme dhe të shëndoshë”.
Kim mbërriti në Rusi të mërkurën.
