Profesori Lush Susaj, i ftuar këtë të enjte në emisionin “Quo Vadis” të moderatores Pranvera Borakaj në Vizion Plus, ka folur për protestën e qytetarëve.
Susaj u bëri thirrje të rinjve të kthehen në Shqipëri, ndërsa akuzoi politikën se po shkakton braktisjen e vendit.
Ai theksoi se është anashkaluar nga çdo projekt, sepse ka protestuar. Madje, sipas tij, është arritur deri aty sa e kanë lënë pa kondicioner në zyrë.
Pjesë nga biseda:
Borakaj: Pse sot është përballje me të vërtetën?
Susaj: Kjo është hera e tretë. Unë isha në protestë edhe në vitin 1990 dhe e di si degjeneroi pas vitit 1992.
Borakaj: Keni të njëjtën frikë sot?
Susaj: Kam qenë në protestën studentore dhe e di se çfarë ju bëjnë. Ju bëj thirrje studentëve: kthehuni në Shqipëri, kthehuni nëse besoni në Zot.
Nëse dështojmë në këtë protestë të tretë, nëse klanet ogurzeza e shtypin dhe e masakrojnë, sikurse masakruan protestën studentore, shqiptari duhet ta dijë se studenti ka dy prindër: atë në shtëpi dhe atë në shkollë.
Prindi në shtëpi, nga varfëria, e ka shitur votën. Kanti thotë se nëse korrupsioni bën vend, populli duhet të zgjidhë kontratën e qeverisjes.
Nëse shkohet në kacafytje si në vitin 1996, vendi kthehet 100 vite mbrapa. Nëse politikanët janë shqiptarë, duhet ta kuptojnë se ky vend është dheu i nënës dhe duhet të mendojnë mirë, duke mos e mësuar rininë të shesë votën.
Rinia e Shqipërisë e pësoi edhe nga shkolla. Në vitin 2018, pedagogët u shantazhuan nga partitë politike.
Borakaj: U shantazhuat ju?
Susaj: Unë u mënjanova nga çdo projekt, nga çdo ekspertizë. Edhe në zyrë, të tjerët kanë kondicionerë, ndërsa unë nuk kam kondicioner. Nuk kam prindër. Në dimër kam blerë rezistencë.
