Norvegjia është në ndërtim e sipër të njërit prej projekteve më të mëdha inxhinierike në Evropë – tunelit Rogfast, i cili pritet të jetë tuneli nënujor më i gjatë dhe më i thellë në botë. Me një gjatësi prej 26.7 kilometrash dhe një thellësi prej 390 metrash nën nivelin e detit, ky tunel do të përshkojë nën fjordet e vendit dhe do të lidhë qytetet Stavanger dhe Bergen, duke shkurtuar kohën e udhëtimit mes tyre me rreth 40 minuta.
Pjesë e autostradës E39, që lidh jugun dhe veriun e bregdetit perëndimor norvegjez, Rogfast do të zëvendësojë kalimet me traget dhe do të përmirësojë ndjeshëm lëvizjen e njerëzve dhe mallrave. Projekti përfshin edhe lidhjen me ishullin Kvitsøy përmes një “shtylle” nënujore dhe dy rrethrrotullime të ndërtuara 260 metra poshtë detit, që do të sigurojnë qarkullim edhe në rast emergjencash.
Ndërtimi ka nisur në vitin 2018 dhe aktualisht është në gjysmën e rrugës, me një kosto totale prej 25 miliardë Krone Norvegjeze (rreth 2 miliardë euro). Përdoret metoda e shpimit përmes shkëmbinjve të ngurtë për të garantuar stabilitetin e strukturës nën presionin e ujit.
Përfundimi i projektit pritet në verën e vitit 2033 dhe pritet të ketë ndikim të madh në zhvillimin ekonomik, industrial dhe turistik të rajonit perëndimor të Norvegjisë.
/vizionplus.tv
