Nënkryetari i LSI, Petrit Vasili nuk i ndali as këtë të mërkurë kërcënimet për punonjësit e policisë që ushtruan dhunë gjatë protestës për Teatrin Kombëtar. Ai tha për mediat se të gjithë janë identifikuar dhe do të mbajnë përgjegjësi.
“Policia gjithashtu me dhunë, si në këto pamje që shikoni, ka vënë këpucën mbi fytyrën e qytetarit. Pra një këpucë e bërë pis, një këpucë e qelbur është vënë mbi fytyrën e qytetarit të thjeshtë, pa asnjë interes personal, por thjesht vunë zemrën për mbrojtjen e një objekti të trashëgimisë kulturore, që bashkë me shembjen e tij po tregon dhe shembjen e shtetit ligjor. Këta persona që shikoni ka emër dhe mbiemër, kanë edhe fytyrë, janë edhe të fotografuar, edhe të filmuar dhe asnjë ligj nuk iu ka lejuar që nga 15 njëherazi të hidhen me egërsi dhe tërbim mbi qytetarët. Ashtu sikurse gazeta austriake derStandard thotë si naziski. Por çfarë pandehin këta naziskinj, që nuk i njeh populli? Po i njohuím që të gjithë. I kemi evidentuar dhe po i evidentojmë me një kujdes të jashtëzakonshëm për të mos harruar asnjë detaj, asnjë emër, asnjë fytyrë cilado qoftë dhe për t’u përgjigjur deri më një.”
Ai ju përgjigj edhe të gjithë përfaqësuesve të mazhorancës që kanë deklaruar në publik se me çfarë ishte ndërtuar Teatri Kombëtar.
“Me qenë se arkitekti Balla, arkitekti Rama dhe arkitekti Veliaj, 3 të pashkollë që po u tregojnë tallashin e Teatrit Kombëtar shqiptarëve po u them që Europa Nostra dhe komisionerja për kulturën në BE, Gabriel e njohin më së miri dhe e kanë konsideruar si monument të rrezikuar që duhet mbrojtur dhe kanë kerkuar të mos merret kurrë një vendim i tillë i pakthyeshëm, si ky vendim, më i poshtri që mund të jetë marrë ndonjëherë. Po a ka një shqiptar që mendon se ka të drejtë arkitekti Taulant Balla dhe nuk ka Europa Nostra, ku ekzistojnë figura të shkëlqyera të artit, personalitete politike.”
