Në nëntor çmimet iu rikthyen rritjes. Sipas Institutit të Statistikave, në muajin e shkuar inflacioni u rrit në 3.9%, nga 3.8% që shënoi në tetor.
Ky tregues është ndjeshëm më i ulët se një vit më parë, por pavarësisht këtij fakti, ushqimet vazhdojnë të kushtojnë më shtrenjtë për familjet shqiptare.
Ndër produktet për të cilat konsumatorët paguan më shumë, në vend të parë qëndrojnë zarzavatet dhe patatet.
Nderim Kaceli, që merret me tregti prej 28 vitesh në Tiranë, shpjegon se ky shtrenjtim i këtij grupi vjen prej prodhimit të paktë.
“Patatja është rritur sepse nuk ka shumë në treg, por edhe sepse rritet edhe kostoja e prodhimit. Nuk ka fuqi punëtore, ata që janë, duan të paguhen më shumë. Moshat e treta vetëm punojnë. Janë rritur shpenzimet shumë. Korça ka tokë sa të duash, por nuk ka fuqi punëtore. Tokat janë të papunuara. Edhe fasulja është e njëjta situatë si këto të tjerat, nuk ka prodhim, vjen më shumë nga importi dhe vjen më shtrenjt”, tha tregëtari Nderim Kaceli.
Ekspertët presin që gjatë dhjetorit, inflacioni të ruajë të njëjtën tendencë rritëse, për shkak të shpenzimeve më të shtuara që bëjnë familjet.
“Ajo që i ndikon qytetarët është shtrenjtimi i ushqimeve dhe tendenca që edhe në dhjetor do të rriten akoma më shumë sepse është sezoni i fundivitit dhe ne kemi parë që gjithmonë ka një rritje të produkteve ushqimore. Kjo ndikon te qytetarët, te shtresat në nevojë, te pensionistët që gati mbi 60% të të ardhurave të tyre i cojnë për grupin e ushqimeve dhe pijeve joalkoolike. Në momentin që këto çmime rriten, kjo shtresë blen më pak produkte”, tha eksperti i ekonomisë, Klodian Muço.
Një inflacion më i lartë rrit rrezikun që Banka e Shqipërisë të ndërhyjë sërish në treg, duke rritur normën e interesit bazë për lekun, një vendim që ndikon në dy drejtime: nga njëra anë ruan stabilitetetin e çmimeve, por nga ana tjetër, rrit kostot e kredisë për qytetarët./vizionplus.tv
