Udhëheqja politike e Iranit ishte objektivi kryesor i valës së parë të sulmeve të përbashkëta SHBA-Izrael, të kryera herët të shtunën në mëngjes, duke përshkallëzuar ndjeshëm tensionet në Lindjen e Mesme.
Sipas burimeve zyrtare amerikane të cituara nga Reuters, zyrtarët më të lartë iranianë ishin objektivi kryesor i operacionit. Zyra e Udhëheqësit Suprem të Iranit, Ali Khamenei, si dhe rezidenca e presidentit iranian, Masoud Pezeshkian, u vunë në shënjestër.
Raportohet se shtatë raketa u drejtuan ndaj zyrës së Khameneit. Deri më tani, autoritetet iraniane nuk kanë bërë një deklaratë zyrtare mbi vendndodhjen e tij. Një burim nga qeveria iraniane i tha Reuters se Khamenei nuk ndodhej në Teheran në momentin e sulmit dhe ishte zhvendosur më herët në një vend të sigurt.
Gjithashtu u sulmua selia e Trupave të Gardës Revolucionare Islamike (IRGC), ndërsa nuk ka konfirmime për viktima në mesin e zyrtarëve të lartë të qeverisë.
Presidenti amerikan Donald Trump konfirmoi fillimin e operacionit ushtarak, të quajtur Operation Epic Fury, duke deklaruar se synimi është shkatërrimi i kapaciteteve ushtarake të Iranit, eliminimi i programit bërthamor dhe krijimi i kushteve për ndryshim qeveritar.
“Në fund, populli iranian duhet të marrë qeverinë e vet në dorë. Ky mund të jetë shansi i tyre i vetëm për breza të tërë”, tha Trump në një mesazh të filmuar.
Nga ana tjetër, kryeministri izraelit Benjamin Netanyahu deklaroi se sulmet mund të “krijojnë kushte” që populli iranian të marrë fatin e vet në duart e veta.
Ekspertë të sigurisë dhe gjeopolitikës vlerësojnë se objektivat e zgjedhura tregojnë një përpjekje për të dobësuar strukturën udhëheqëse të regjimit iranian. Analisti i mbrojtjes Shashank Joshi theksoi se deklaratat e liderëve amerikanë dhe izraelitë lënë hapësirë për distancim nëse operacioni nuk çon në rrëzimin e regjimit.
Sulmet e fundit shënojnë një ndryshim të qartë nga operacionet e mëparshme. Në qershorin e kaluar, SHBA kishte në shënjestër objekte bërthamore të varrosura thellë dhe larg zonave civile, ndërsa këtë herë goditjet u përqendruan në struktura që lidhen drejtpërdrejt me udhëheqjen politike dhe ushtarake të Iranit.
Situata mbetet e tensionuar, ndërsa pritet reagimi zyrtar i Teheranit dhe zhvillimet e mëtejshme në rajon.
