Pas dy raketave balistike të Iranit që hynë në territorin e Turqisë, presidenti Rexhep Tayyip Erdogan ka akuzuar Teheranin se po vazhdon të ndërmarrë hapa të gabuar dhe provokues. Kreu i shtetit turk thotë se shkelja e hapësirës ajrore nga Irani nuk mund të justifikohet për asnjë arsye.
“Megjithëse i janë dhënë paralajmërimet e nevojshme, Irani vazhdon të marrë hapa jashtëzakonisht të gabuar dhe provokues që do të rëndojnë miqësinë e Turqisë me Teheranin. Nuk mund të justifikohet për asnjë arsye. Turqia do të vazhdojë të marrë të gjitha masat e nevojshme kundër kësaj.”
Ndërkohë, Turqia po vendos një sistem mbrojtës ajror Patriot, pasi po përgatitet për gatishmëri operacionale në Turqinë lindore, si pjesë e përpjekjeve të koordinuara me NATO-n për të ndihmuar në rritjen e sigurisë në hapësirën ajrore të vendit.
“Në dritën e zhvillimeve të fundit në rajonin tonë, po merren masat e nevojshme për të siguruar kufijtë dhe hapësirën ajrore dhe ne jemi në konsultime me NATO-n dhe aleatët tanë”, tha Ministria e Mbrojtjes turke. Njoftimi erdhi mes tensioneve rajonale për shkak të sulmeve të vazhdueshme SHBA–Izrael ndaj Iranit.
