Tre shtetas britanikë me origjinë shqiptare janë arrestuar nga autoritetet kroate, të dyshuar për përfshirje në një rast përdhunimi të një gruaje 28-vjeçare në një hotel në qytetin e Splitit.
Sipas mediave kroate, përfshirë Index.hr, njëri prej të dyshuarve u ndalua në vendngjarje, ndërsa dy të tjerët u kapën më vonë nga policia. Pas hetimeve paraprake, policia ka konstatuar se ekzistojnë dyshime të arsyeshme se të tre të arrestuarit kanë bashkëkryer veprën penale.
Gjykata kompetente ka caktuar masën e paraburgimit për të tre personat, duke marrë parasysh rrezikun e ikjes. Ata përballen me akuza për kryerjen e një vepre të rëndë penale kundër lirisë seksuale.
Sipas legjislacionit penal të Kroacisë, kjo vepër dënohet me burgim deri në dhjetë vjet.
Hetimet vijojnë, ndërsa autoritetet nuk kanë bërë të ditur detaje të mëtejshme për identitetin e të dyshuarve apo viktimës.
/vizionplus.tv
