Ish-deputeti i PD, Luçiano Boçi e ka konsideruar të tmerrshëm njoftimin e shpërndarë nga Fakultetit i Drejtësisë, teksa iu kërkon studentëve që të paraqiten për provim ditën e hënë 30 minuta më herët dhe me të gjitha masat mbrojtëse, pasi rezulton se disa familjarë të studentëve janë të infektuar me COVID-19 apo të karantinuar.
Në një postim në “Facebook”, Boçi shkruan se gjithçka i ngjan një udhëtimi drejt ferrit, duke marrë parasysh faktin që Fakulteti i Drejtësisë e ka pranuar përhapjen masive të COVID-19.
“KASAPHANË 2020. Ndërsa e gjithë bota i ka Universitetet në “online”, vetëm këtu tek ne vazhdohet t’i vendosin studentët në rresht, për t’i rrasur në provim. Mesazhi i dalë nga Fakulteti i Drejtësisë, është i tmerrshëm. Pranohet dhe argumentohet përhapja masive e virusit, por nuk hiqet dorë nga futja në turmë, në salla të mbyllura e studentëve dhe e pedagogëve!!!! Gjithçka i ngjan një udhëtimi drejt ferrit. Më fatlumët do kthehen shëndosh e mirë. Për të tjerët nuk dihet.”
Boçi bën përgjegjës kryeministrin Edi Rama, për të cilin tha se qëndron në heshtje dhe vështron “kasaphanën e orientuar nga ai vetë”.
“Dhe i gjithë ky ngulmim, për t’i çuar studentët në kasaphanë, lidhet me një qëllim. Të quhen sikur u bënë zgjedhjet fiktive të 30 Korrikut! Rama rri e vështron kasaphanën e orientuar nga ai vetë. Atij i duhen me çdo kusht Universitetet, jo jetët e studentëve. Kriminale dhe amorale!”
