Një ngjarje tragjike ka tronditur qytetin e Nju Jorkut mëngjesin e së martës, kur një person i armatosur hapi zjarr brenda një ndërtese zyrash në Park Avenue, në zemër të Manhattanit, duke lënë pesë persona të vdekur, mes tyre edhe një oficer të NYPD-së.
Ngjarja ndodhi në godinën me adresë 345 Park Avenue, ku ndodhen zyrat e Ligës Kombëtare të Futbollit (NFL) dhe firmës së njohur të investimeve Blackstone. Autori i dyshuar është identifikuar si Shane Devon Tamura, 27 vjeç, i cili kishte udhëtuar me makinë nga Las Vegas drejt Nju Jorkut disa ditë para sulmit.
Sipas autoriteteve, Tamura hapi zjarr në hollin e ndërtesës gjatë orës së pikut të mëngjesit, duke vrarë disa persona përpara se të ngjitej në katin e 33-të, ku dyshohet se qëlloi veten në gjoks, duke i dhënë fund jetës.
Përveç pesë viktimave, një person ndodhet në gjendje kritike por të qëndrueshme, ndërsa katër të tjerë u plagosën lehtë teksa tentonin të largoheshin nga vendi i ngjarjes.
Hetimet paraprake zbuluan se Tamura ishte i pajisur me një pushkë sulmi M4, një armë zjarri të dorës, municione, karikatorë dhe ilaçe, të cilat u gjetën në automjetin e tij. Megjithatë, nuk u gjetën mjete shpërthyese.
Ai kishte leje për mbajtjen e armëve në shtetin e Nevadës, ku kriteret për pajisje me armë janë minimale dhe nuk kërkojnë vlerësim të thelluar të shëndetit mendor, ndonëse Tamura kishte një histori të dokumentuar në këtë drejtim.
Motivet që çuan në këtë akt të dhunshëm mbeten të paqarta. Policia e Nju Jorkut dhe FBI janë duke hetuar nëse sulmi kishte ndonjë qëllim specifik dhe përse u zgjodh pikërisht kjo ndërtesë.
Ndër viktimat ishte edhe oficeri Didarul Islam, 36 vjeç, emigrant nga Bangladeshi, baba i dy fëmijëve dhe në pritje të fëmijës së tretë. Kryebashkiaku Eric Adams e përshkroi atë si “një hero të qytetit” dhe shprehu ngushëllimet e tij familjes së viktimës, duke theksuar se humbja e tij është një goditje e rëndë për të gjithë komunitetin.
Ndërkohë, agjentët e FBI-së janë në terren dhe po vijojnë hetimet për të hedhur dritë mbi rrethanat e këtij sulmi të rëndë, që ka lënë të tronditur qytetin dhe më gjerë.
/vizionplus.tv
