Ministria e Shëndetësisë e drejtuar nga Hamasi në Gaza ka thënë se dhjetëra njerëz u vranë ose u plagosën pas një shpërthimi në një kamp refugjatësh në zonën Rafah.
Forcat e Mbrojtjes së Izraelit (IDF) thanë se kishin kryer një sulm ajror duke synuar një kompleks të Hamasit në zonë.
Më herët gjatë ditës së djeshme Hamasi lëshoi tetë raketa nga Rafah drejt Tel Avivit, sulmet e para me rreze të gjatë mbi qytet që nga janari.
Hamasi tha se një sulm ajror izraelit kishte goditur një kamp për palestinezët e zhvendosur në veri-perëndim të Rafahut, larg operacioneve të fundit ushtarake në një zonë të sigurt humanitare.
Ai thotë se në mesin e të vdekurve ka gra dhe fëmijë.
IDF tha se kishte shënjestruar militantët e Hamasit në zonë dhe tha se ishte në dijeni të raporteve se sulmi kishte ndezur një zjarr që dëmtoi civilët.
Në një deklaratë, IDF tha se kishte “eliminuar” dy figura të larta të Hamasit, Yassin Rabia dhe Khaled Nagar, në një sulm “të saktë” ajror “në veri-perëndim të Rafahut”.
Ministria e Shëndetësisë e drejtuar nga Hamasi tha se 35 njerëz ishin vrarë dhe dhjetëra ishin të plagosur në një sulm izraelit.
Një zëdhënës i Shoqatës së Gjysmëhënës së Kuqe Palestineze i cituar nga agjencia e lajmeve Associated Press tha se numri i të vdekurve ka të ngjarë të rritet ndërsa përpjekjet e kërkim-shpëtimit vazhduan në lagjen Tal al-Sultan të Rafah rreth 2 km në veri-perëndim të qendrës së qytetit.
Një dëshmitar okular i tha agjencisë së lajmeve Reuters se e gjithë lagjja në Tal Al-Sultan ishte “djegur”.
Më herët të dielën, sirenat e sulmit ajror u dëgjuan rreth Tel Avivit, ndërsa Izraeli qendror u sulmua nga raketat e Hamasit, të lëshuara nga Rafahu.
Ofensiva ushtarake e Izraelit ka vazhduar në Rafah, pavarësisht se Gjykata Ndërkombëtare e Drejtësisë vendosi të premten se ajo duhet të ndalet.
Breshëria e raketave nënvizon kërcënimin që Hamasi ende paraqet për njerëzit në të gjithë Izraelin, megjithëse nuk ka raportime për të lënduar.
Ai gjithashtu ilustron sfidat me të cilat përballet ushtria izraelite ndërsa lëviz më tej në Gazën jugore për të larguar Hamasin nga ajo që ajo e quan “fortesa e tij e fundit e madhe”./vizionplus.tv
