Një 32-vjeçar britanik, i akuzuar se ka sulmuar me thikë disa pasagjerë në një tren në Anglinë Lindore, nuk ishte i njohur nga policia kundër terrorizmit apo shërbimet e sigurisë, njoftoi sot ministrja e Transportit, Heidi Alexander.
Sulmi ndodhi mbrëmjen e së shtunës dhe shkaktoi plagosjen e 11 personave, përfshirë një anëtar të ekuipazhit të trenit, i cili vazhdon të trajtohet në spital në gjendje kritike, por të qëndrueshme. Pesë nga të plagosurit u lëshuan nga spitali të dielën vonë.
Alexander bëri të ditur për Times Radio se i dyshuari, i cili u arrestua për tentativë vrasjeje, nuk ishte i shënjestruar nga autoritetet kundër terrorizmit para incidentit. Ajo nuk dha detaje nëse personi ishte i njohur nga shërbimet e shëndetit mendor.
Policia Britanike e Transportit tha se oficerët mbërritën në vendngjarje brenda tetë minutave nga thirrja e parë për emergjencë. Një thikë u gjet në vendin e ngjarjes dhe hetuesit po shqyrtojnë pamjet e kamerave të sigurisë, që tregojnë se një anëtar i ekuipazhit ndërhyri për të ndaluar sulmuesin.
CCTV of the train knifeman has been released.
Screams can be heard as people flee the mass stabbing.
The attacker calmly walking away, knife in hand. pic.twitter.com/SInlzilYcX
— Tommy Robinson 🇬🇧 (@TRobinsonNewEra) November 2, 2025
“Ai hyri në mes duke rrezikuar jetën e tij,” tha Alexander. “Shumë njerëz janë gjallë sot falë veprimeve të tij.”
Ekuipazhi i trenit vazhdon të trajtohet në gjendje kritike, por të qëndrueshme.
I dyshuari u arrestua kur treni ndaloi emergjentisht në Huntingdon, rreth 130 km në veri të Londrës. Autoritetet konfirmuan se nuk kërkojnë asnjë person tjetër në lidhje me ngjarjen.
/vizionplus.tv
