Erion Ahmeti specialist i Policise Rrugore në një intervistë në emisionin 7pa5 në Vizion Plus ka folur për përdorimin e skuterave elektrik në vendin tonë, të cilat janë një masë e shtuar.
Ndonëse Franca pezulloi përdorimin e tyre për shkak të rrezikshmërisë që paraqet, Ahmeti nuk ndau të njëjtin mendim.
Sipas tij, skuterat janë shtuar në përdorim kohët e fundit, por thekson se ata nuk janë të rrezikshëm, në rast se respektojnë sinjalistikën rrugore.
“Janë një element i shtuar jo i rrezikshëm për të cilën duhet të jepet i njëjti apel si për këmbësoret, të përcaktojë rregullat se ku duhet të qarkullojnë dhe mos bëhen problem për veten dhe të tjerët. Për sa kohë jemi përdorues të rrugës nuk ka dallim mes këmbësorëve apo përdoruesve të skutera”, tha ai.
Erion Ahmeti më tej tha se viti 2022 ka qenë më i mirë, ku janë shënuar më pak aksidente rrugore, jo vetëm në analizën që bëhet çdo vit nga policia, por edhe në Rajon.
“Në 2022 policia rrugore për shkak të punës së bërë, ka qenë një nga vitet më të mira, me aksidente më të ulëta, jo vetëm me krahasimet që ne bëjmë nga viti në vit por edhe me vendet e Rajonit”.
Specialisti i Policisë Rrugore u bëri apel drejtuesve të mjeteve dhe këmbësorëve të tregojnë kujdes të respektojnë të gjitha sinjalistikat rrugore, për të mos sjellë pasoja fatale.
