Në vetëm një javë, administrata Trump e ka quajtur Rusinë një “fuqi rivale”, ndërsa vendosi të furnizojë Ukrainën me armë anti-tank për të ndihmuar në luftën kundër separatistëve të mbështetur nga Rusia në pjesën lindore të vendit.
Moska ka reaguar me indinjatë, duke paralajmëruar se veprimi do të sillte më shumë gjakderdhje, duke dhene kështu sinjale të qarta për tensionim të mëtejshme të marrëdhënieve midis dy vendeve.
Departamenti Amerikan i Shtetit sqaroi përmes një deklarate dhe tha se vendimi për të ndihmuar Ukrainën me “rritje të aftësive të mbrojtjes” ka si synim “përpjekjet për të ndihmuar vendin të ndërtojë aftësitë afatgjata të mbrojtjes, për të mbrojtur sovranitetin dhe tërësinë territoriale të saj”.
Deklarata shton se “ndihma amerikane është tërësisht e një natyre mbrojtëse”.
Paketa totale e mbrojtjes prej 47 milionë dollarësh përfshin shitjen e 210 raketave anti-tank dhe 35 raketa-hedhësve.”
Më herët këtë muaj, Sekretari Amerikan i Shtetit paralajmëroi Rusinë se kriza e Ukrainës ishte pengesa më e madhe për përmirësimin e lidhjeve mes dy vendeve.
Nga ana tjetër, Gjermania dhe Franca kanë kërkuar nga të gjitha palët e përfshira në shkeljen e armëpushimit në pjesën lindore të Ukrainës, që t’i ndalin aksionet e tyre dhe te zgjidhin konfliktin ne rruge paqësore.
