Presidenti serb Aleksandër Vuçiç ka deklaruar se vendi i tij nuk po eksporton më armë. Lajmin e bëri të ditur ndërsa u pyet nga gazetarët se cilën anë ka zgjedhur Beogradi mes Tel Avivit dhe Teheranit.
“Ne tani nuk eksportojmë asgjë. I kemi ndalur të gjitha dhe, nëse do të lejohet diçka, duhet të merren vendime të posaçme dhe të veçanta. Pastaj, do të shohim si do të veprojmë, në përputhje me interesat e Serbisë. Organet më të larta shtetërore do të informohen për këtë”, tha Vuçiç.
Duke iu përgjigjur kritikave për eksportin e armëve, Vuçiç tha se kujdeset për sigurinë e shtetit, por edhe për punëtorët në industrinë e mbrojtjes, ku prodhohet municioni që Serbia më herët e eksportonte jashtë vendit.
“Dhe, për të ndryshuar diçka, mund vetëm në këtë mënyrë që të them: të gjithë municionin, për një periudhë, vetëm për kazermat tona”, tha presidenti serb.
Duke folur për konfliktin Izrael–Iran, Vuçiç tha se Serbia dëshiron paqe në Lindjen e mesme. Ai theksoi se Beogradi dëshiron marrëdhënie sa më të afërta dhe partneritet strategjik me Shtetet e Bashkuara, por vlerësoi se “nuk ka asnjë dyshim se është shkelur e drejta ndërkombëtare” me sulmin ndaj Iranit./vizionplus.tv
