Anëtarët e Këshillit të Sigurimit të Kombeve të Bashkuara debatuan në një mbledhje të jashtëzakonshme të thirrur nga Rusia, rastin “Skripal”.
Takimi u zhvillua me kërkesë të ambasadorit rus në OKB, Vasily Nebenzia, menjëherë pas njoftimit të bërë nga laboratori kimik britanik Porton Doun, se ka zbuluar agjentin nervor, i njëjti si ai që është prodhuar gjatë luftës në Ish Bashkimin Sovjetik.
I dërguari i Rusisë i OKB-së e përshkroi helmimin e agjentit të dyfishtë rus Sergei Skripal një “teatër absurd”, dhe akuzoi Mbretërinë e Bashkuar se ka shpikur një “histori të rreme”.
“As nuk e di se si të komentoj për këtë. Është një lloj teatri absurde. Ju nuk mund të keni dalë me histori më të mirë të rreme? Ne u kemi thënë kolegëve tanë britanikë, se po luajnë me zjarrin dhe duhet t’ju vijë keq për këtë”.
I dërguari i Kremlinit kërkoi që vendi i tij të ketë akses në materialet hetimore që ekspertët londinezë kanë arritur të mbledhin deri më tani.
Por përfaqësuesja e Britanisë në OKB, Karen Pierce, akuzoi Rusinë për minimin e sigurisë globale.
“Të gjithë e dimë pse po zhvillohet hetimi, sepse një agjent nervor ushtarak u përdor në një përpjekje për të vrarë civilë në tokën britanike pa marrë parasysh sigurinë publike. Ishte një armë e shkatërrimit në mase. Rusia kërkon të ketë akses në hetim. Kjo kërkesë është si ajo e një zjarrvënësi i cili kërkon të hetojë zjarrin që ndezi vetë”.
Britania e Madhe pretendon se Rusia fshihet pas sulmit me agjent nervor, por Moska ka mohuar vazhdimisht përgjegjësinë.
Rasti “Skripal” e ka përballur Rusinë me një sërë tensionesh diplomatike. Deri më tani më shumë se 150 diplomatë rus janë deportuar nga blloku perëndimor.
