Ministrja i Infrastruktures ka inspektuar rrugën e Rinasit, e cila konsiderohet një nga akset me numrin më të madh të aksidenteve për shkak të kryqëzimeve. Ky shqetësim është ngritur vazhdimisht nga banorët e zonës.
BELINDA BALLUKU
MINISTRE E INFRASTRUKTURES
“Sot kam ardhur në rrugën që lidh kthesën e Kasharit me aeroportin internacional të Rinasit, për shkak se kjo është një rrugë, që siç duket edhe në këto momente, ka një frekuencë të lartë të automjeteve. Por nga ana tjetër është një rrugë e cila fatkeqësisht ka dhe një numër shumë të lartë aksidentesh”
Balluku tha se kjo rrugë nuk i ka aktualisht kushtet e sigurisë.
“Gjatë vitit 2018 është raportuar nga Policia Rrugore se kemi pasur 9 aksidente me pasojë jetën e qytetarëve, kemi pasur 3 vdekje dhe 15 dëmtime të rënda. Ndërkohë që kjo është një rrugë ku aksidente, të cilat nuk raportohen janë të përditshme. Fatkeqësisht ka pasur edhe problematika me komunitetin që jeton këtu. Unë i kam ata këtu sot, duke qenë se shpeshherë kanë dëmtime të automjeteve të tyre, të fëmijëve që kalojnë rrugën, pra është një rrugë e cila sot nuk i ka kushtet e sigurisë”.
Ministrja ka kërkuar nga Autoriteti Rrugorë Shqiptar si dhe nga firma e mirëmbajtes së rrugëve, që të gjejnë një zgjidhje të menjëherëshme për ndryshuar situatën në këtë segment të rëndësishëm.
