Të dhënat më të fundit mbi mirëqenien ekonomike dhe arsimore të shqiptarëve ringjallin shqetësime serioze për drejtimin ku po ecën vendi.
Eksperti i ekonomisë, Azmi Stringa analizoi disa nga treguesit më kritikë, uljen e cilësisë së konsumit të familjeve shqiptare, rënien e rezultateve në arsimin parauniversitar sipas testimeve ndërkombëtare PISA, si dhe normën alarmante të të rinjve që as nuk punojnë, as nuk studiojnë.
Ndërsa vendet e Bashkimit Europian kanë përjetuar goditje të moderuara gjatë krizave, Shqipëria rezulton të jetë prekur shumë më rëndë, si në ekonominë familjare, ashtu edhe në cilësinë e arsimit.
Këto zhvillime, sipas ekspertit, kërkojnë një strategji kombëtare urgjente dhe të qëndrueshme.
Pjesë nga biseda:
Stringa: Familjet shqiptare po hanë ose më pak, ose më keq. Cilësi më të ulët. Pra, ka ndryshuar cilësia në krahasim me 2014, në terma realë. Çfarë është e bukura? Kjo gjë ka ndodhur edhe në Bashkimin Evropian. Edhe në BE, ata që harxhojnë më pak janë goditur me 5% gjatë kohës që ndodhi kriza. Ne, po ta shohim, jemi goditur shumë më shumë.
Borakaj: Pra, ata me 5%, ndërsa ne me 22%.
Stringa: Por ata, hera e fundit që janë goditur ka qenë kur ka qenë kriza e 2008-ës, rritja e çmimeve të ushqimeve. Ndërsa ne u goditëm, pa ndonjë arsye të dukshme, në vitet 2014-2020, kohë kur në vendet e tjera çmimet s’po rriteshin. Kjo tregon shëndetin e familjes shqiptare, kur kjo rënie bëhet në terma kaq të mëdhenj. Të gjithë e kanë parë këtë, familja shqiptare ka lënë kaçkavallin dhe ka shkuar tek një djathë më i dobët. Kanë lënë mishin dhe kanë shkuar te më shumë oriz.
Borakaj: Më shqetëson shumë niveli i edukimit në Shqipëri. Tre komponentët që keni marrë, matematikë, gjuhë dhe shkencë. Në të treja ne jemi me minus,-20 pikë në matematikë, -11 në Gjuhë, dhe -11 në Shkencë.
Stringa: Këto janë rezultatet e PISA-s. Fatkeqësisht, ne kemi bërë regres në arsim dhe kjo duhet të na bëjë të shqetësohemi jashtëzakonisht shumë. Shqipëria duhet ta bëjë strategji këtë, sidomos arsimin parauniversitar. Do të flitet vetëm për reformën e arsimit.
Borakaj: I referohemi arsimit publik dhe jo publik.
Stringa: Po, bëhet fjalë për arsimin parauniversitar. Ne kemi edhe një problem tjetër. Ne kemi normën më të lartë në Evropë të të rinjve që nuk bëjnë asnjë gjë. Pra, as nuk punojnë, as nuk studiojnë.
/vizionplus.tv
